«Сыл учуутала» күрэх кыайыылааҕынан Павел Гоголев буолла

Өрөспүүбүлүкэтээҕи «Сыл учуутала» күрэх кыайыылааҕынан Куораттааҕы классическай гимназия историяҕа уонна обществознаниеҕа преподавателэ Павел Гоголев буолла диэн СӨ Үөрэҕириигэ министиэристибэтин пресс-сулууспата иһитиннэрдэ.

Тэрээһиҥҥэ Саха сирин оскуолаларыттан барыта 30 педагог кытынна. Сэттэ күн устата кинилэр бэйэлэрин билиилэрин, үөрэнээччилэри кытта үлэлиир сатабылларын көрдөрдүлэр.

Финалга биэс педагог таҕыста. Кыайыылаахха «Сыл учуутала» бочуоттаах бэлиэни уонна көмпүүтэри атыылаһарга уонна үөрэнэргэ сертификат туттарылынна.

«Улахан эппиэтинэс санныбар сүктэрилиннэ, кэлэр сылга гимназиям аатыттан эрэ буолбакка, бүтүн Дьокуускай уонна өрөспүүбүлүкэ ааттарыттан куонкуруска кыттабын. Бу мин эрэ буолбакка, Куораттааҕы классическай гимназия улахан педагогическай дьиэ кэргэнин кыайыыта. Дириэктэрбитигэр уонна настаабынньыкпар Клара Егоровна Андрееваҕа истиҥ махталбын тиэрдэбин», — диир Павел Гоголев.