Евгений Григорьев уочараттаах приема буолан ааста

Алтынньы 7 күнүгэр баһылык Евгений Григорьев куорат олохтоохторун кытта көрсүһүүтэ үүнээйи олордуутун, анал байыаннай дьайыыга гуманитарнай көмө уонна «Сатал» СНТ кыһалҕаларын тула буолла.
Анал байыаннай дьайыыга хантараагынан сулууспалыыр Айаал П. взводугар гуманитарнай көмө көрдөөбүт. Евгений Григорьев бэлиэтээбитинэн, байыаннай сулууспалаах «Победа» аһымал пуондаҕа суруйдаҕына, сөптөөх гуманитарнай көмө оҥоһуллар кыахтаах. Оттон Айаал П. бэйэтэ элбэх оҕолоох аҕа буоларынан, баһылык Дьокуускай куораттааҕы анал байыаннай дьайыы кыттыылаахтарын өйүүр киин үлэһиттэригэр оҕолорго көрүллэр чэпчэтиилэри хонтуруолга ыларга сорудахтаата.
Урбаанньыт Николай Захаров баһылыкка куораты көҕөрдүүгэ саҥа этиилэрдээх кэлбит. Ол курдук, Николай Алексеевич олордуу үүнээйилэргэ хааппыланан ууну кутуу, «сибэкки истиэнэ» быһыытын уларытыы, бэлэм кулуумбалары көһөрүү туһунан санааларын үллэһиннэ. Евгений Григорьев урбаанньыкка махтанан туран, «сибэкки истиэнэтигэр» Култуура уонна сынньалаҥ пааркатыгар миэстэ көстүөн сөп диэн эрэннэрдэ.
«Сатал» СНТ олохтоохторун бэрэстэбиитэлэ Евдокия Л. уонна юрист Ольга Саргыдаева түөлбэ кыбаарталларыгар көҥүлэ суох тутууну ыытыы, сири бас билии туһунан иһитиннэрдилэр.
Евгений Григорьев бэлиэтээбитинэн, бу боппуруос Олохтоох дьаһалта хонтуруолугар турар: миэстэтигэр бэрэбиэркэлэр, мунньахтар тиһигин быспакка ыытыллаллар, прокуратураны кытта ыкса ситимнээх үлэ барар.
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).