Федор Поповка аналлаах пааматынньык Кыайыы күнүгэр арыллыаҕа

Баһылык Евгений Григорьев 2024 сыл түмүгүнэн суруналыыстары кытта көрсүһүүтүгэр Сэбиэскэй Сойуус Дьоруойа Федор Поповка аналлаах пааматынньык ыам ыйын 9 күнүгэр аһыллыаҕа диэн иһитиннэрэн турар. 
Пааматынньык турар миэстэтинэн Дзержинскэй уонна Дьоруой бэйэтин аатын сүгэр уулуссалар быһа охсуһуулара анаммыта. Санатар буоллахха, Федор Попов аатынан сквери тупсарыы үлэтэ быйыл түмүктэммитэ.
Улуу Кыайыы 80 сылыгар бэлэмнэнии чэрчитинэн, итини сэргэ Дьокуускайга Сэбиэскэй Сойуус Дьоруойдарын аатын сүгэр уулуссаларга, уопсастыбаннай туоналарга тупсарыы, өрөмүөн үлэтэ ыытыллыаҕа. Былааҥҥа маны сэргэ Гериатрия балыыһатыгар киирэр суолу оҥоруу, Кыайыы болуоссатыгар хапытаалынай өрөмүөн киирэн тураллар.
Аҕа дойду сэриитин кыттыылаахтарыгар аналлаах мемориальнай дуоскалары инвентаризациялааһын түмүгүнэн 25 дуоска саҥардыллара быһаарыллыбыта. Урут хаһаайына суох 17 эбийиэк, ол иһигэр Аҕа дойду сэриитин кыттыылаахтарыгар, бэтэрээннэригэр аналлаах пааматынньыктар, муниципальнай бас билиигэ бэриллибиттэрэ.
Кыайыы пааркатыгар «Килбиэннээх үлэ куората» стела туруоҕа, парковка, сцена оҥоһуллуохтара, уот-күөс тардыллыаҕа.
Култуурунай-маассабай уонна спортивнай үлэ былааныгар «Проспект Победы», «Танцующий город» уонна «Стена Победы» саҥа тэрээһиннэр бааллар, Кангалаас – Табаҕа хайысханан сүүрүү о.д.а. киирбиттэрэ.

Хаартыска: С. Винокуров, Олохтоох дьаһалта пресс-сулууспата