Куорат Ытык сүбэтэ бүгүҥҥү салалта үлэтин өйүүр

Ахсынньы 18 күнүгэр куорат баһылыга Евгений Григорьев уонна Куорат дууматын бэрэссэдээтэлэ Альберт Семенов Ытык сүбэни кытта көрүстүлэр. 
Евгений Григорьев көрсүһүү кыттыылаахтарыгар ааһан иһэр 2024 сыл сүрүн түмүктэрин билиһиннэрэригэр «Куттала суох уонна хаачыстыбалаах суоллар» нацбырайыак тырааныспар инфраструктуратын тупсарарын, 2030 сылга диэри Дьокуускай куорат дойду баһылыга Владимир Путин бигэргэппит маастар-былаанынан сайдарын бэлиэтээтэ, о.д.а. үтүө өрүттэргэ тохтоото. Кэлэр 2025 сылга инфраструктураны сайыннарыыга, уопсастыбаннай туоналары тупсарыыга, социальнай эбийиэктэри тутууга туһуланар үлэ тэтимин ыһыктыбатын эрэннэрдэ. 
Николай Лепчиков бэрэссэдээтэллээх Куорат Ытык сүбэтэ Дьокуускай куорат бүгүҥҥү олоҕор көхтөөх кыттыыны ылар. Бэйэтин кэмигэр куорат хомунаалынай хаһаайыстыбатын салайбыт Николай Лепчиков кэлиҥҥи сылларга кыстыкка бэлэмнэниигэ болҕомто күүһүрбүтүн бэлиэтээтэ. 
Ытык кырдьаҕастар куорат атын даҕаны эйгэлэригэр сыһыаннаах этиилэрин, көрүүлэрин үллэһиннилэр. Баһылык Евгений Григорьев уонна Куорат дууматын бэрэссэдээтэлэ Альберт Семенов ытык кырдьаҕастарга куорат сайдарыгар уҕараабат кыһамньыларын, сүбэлэрин-амаларын иһин махталларын биллэрдилэр, диэн Олохтоох дьаһалта пресс-сулууспата иһитиннэрэр.