Хапытаалынай өрөмүөн пуондатыгар хомуллар усунуос хаарбах дьиэттэн көһөрүүнү кытта туох ситимнээҕий?

РФ Дьиэ-уот кодексатын 169 ыст. 1 ч. элбэх кыбартыыралаах дьиэҕэ киһи олорор уонна олорбот помещениелары бас билээччилэр уопсай баай-дуол хапытаалынай өрөмүөнүгэр ый аайы усунуос төлүүллэр.

Маныаха саахалланар туруктааҕынан билиниллибит элбэх кыбартыыралаах дьиэлэр Саха Өрөспүүбүлүкэтин территориятыгар хапытаалынай өрөмүөн бырагырааматыттан таһаарыллаллар, усунуос төлөбүрэ тохтотуллар. Оттон элбэх кыбартыыралаах олорор дьиэлэри хаарбах уонна саахалланар туруктааҕынан билиниинэн олохтоох бэйэни салайыныы уоргана дьарыктанар. 
«СӨ элбэх кыбартыыралаах олорор дьиэ хапытаалынай өрөмүөнүн пуондата» кэмиэрсийэтэ суох тэрилтэ дьиэни бас билээччилэри кытта үлэҕэ салаатын начаалынньыга Саида Петрова бэлиэтииринэн, 2024 сыл ахсынньы 16 күнүнээҕи туругунан региональнай бырагырааматтан 3 738 элбэх кыбартыыралаах дьиэ таһаарыллыбыт.
«Дьиэбит саахалланар туруктааҕынан билинилиннэҕинэ, эрдэ төлөөбүт усунуоспут ханна барарый диэн элбэх ыйытыы киирэр. Бастатан туран, киирбит харчы хаарбах уонна саахалланар туруктаах дьиэттэн көһөрүү бырагырааматынан дьиэни көтүрүүгэ туһаҕа тахсар. Иккиһинэн, дьиэ саахалланар туруктааҕынан билиниллиэр диэри ааҕыллыбыт иэһи төлүүргэ тиэтэйиэххэ наада. Тоҕо диэтэххэ дьиэни бас билээччи олохтоох бэйэни салайыныы уорганыгар иэһэ суоҕун туһунан ыспараапканы тиксэриэхтээх. Ахсынньы 31 күнүгэр диэри бу иэһи пенята суох төлүүр кыах баар», — диир Саида Николаена.
Сиһилии тэрилтэ Fondkr.ru официальнай саайтыгар билсиэххэ сөп, диэн иһитиннэрэр СӨ дьиэ-уот, хомунаалынай хаһаайыстыба уонна энергетика министиэристибэтэ.