Куорат уулуссаларын 100 % сырдатыыга концессия механизма көмөлөһүөҕэ
«Сырдык киин куорат» муниципальнай бырагыраамаҕа 2024 сылга 40 мөл. солк. кэриҥэ харчы тыырыллан, уопсайа 7027 миэтэрэ усталаах уулусса-суол ситимин былаһын тухары 208 тирээбил уонна 249 светильник туруорулунна диэн ааспыт нэдиэлэҕэ суруйан турабыт.
Ил Дархан Айсен Николаев уонна Саха Өрөспүүбүлүкэтин бырабыыталыстыбатын өйөбүллэрин ылбыт «Сырдык киин куорат» муниципальнай бырагырааманан уонна «Куттала суох уонна хаачыстыбалаах суоллар» национальнай бырайыагынан ити курдук быйыл киин куорат уулусса-суол ситимэ 70% уоттанна.
Оттон Дьокуускай куорат уулуссалара бүтүннүү сырдатыллалларыгар дойду баһылыга Владимир Путин көҕүлээһининэн тэриллибит Уһук Илиҥҥи концессия механизмын нөҥүө үбү тардар былаан баар.
Ахсынньы 17 күнүгэр “Россия 24” тэлэбиидэнньэ ханаалын “Куораты кытта быһа эпиир” биэриитигэр Дьокуускай куорат баһылыга Евгений Григорьев концессионнай сөбүлэҥи 2025 түһэрсэр былаан баарын бэлиэтээтэ. Ол эрээри уулуссалары сырдатыы үлэтэ концессионнай сөбүлэҥ түмүгүн күүтүүнэн муҥурдамматын, быйыл аҥаардас муниципальнай бырагырааманан 17 эбийиэккэ 7027 м усталаах суолга сырдатыы үлэтэ ыытыллыбытын, маны таһынан «Куттала суох уонна хаачыстыбалаах суоллар» нацбырайыагынан эмиэ улахан иэннээх үлэ барбытын бэлиэтээтэ.
Уулуссалары сырдатыы нэһилиэнньэ санаатын эмиэ учуоттуур. Ол курдук, холобура, тустаах уулуссаҕа уот тардыллара наадатын туһунан этиилэри уокуруктар дьаһалталара, Куорат хаһаайыстыбатын үлэлэтэр сулууспа тута олороллор, диэн Олохтоох дьаһалта пресс-сулууспата иһитиннэрэр.
Сонуннар
Ордук ааҕаллар
