«Биометрияларын» туттарар буолуохтара

Арассыыйаҕа киирэр тас дойду олохтоохторо ахсынньы 1 күнүттэн РФ судаарыстыбаннай кыраныыссатын туоруулларыгар биометрическай дааннайы туттарар эбээһинэстэннилэр. Итиннэ сирэйдэрин хаартыскаҕа түһэрии, тарбахтарын суолун түһэрэн ылыы киирэр. Билиҥҥитэ, эспэримиэн быһыытынан, тэхиньиичэскэй хааччыллыы таһымыттан көрөн, Шереметьево, Домодедово, Внуково, Жуковскай пуортарыгар уонна массыына суолугар Оренбург куоракка баар Маштаково пуунугар эрэ олоххо киирбит. Кэнэҕэһин кыраныысса бары пууннарыгар туттуллуо.

2025 сыл бэс ыйыттан саҕалаан 2026 сыл бэс ыйын 30 күнүгэр диэри кэм иһинэн хас биирдии Арасыыйаҕа киирбит тас дойду олохтооҕор “цифровой профиль” оҥоһуллуоҕа. Ону судаарыстыба өҥөтүн оҥорор порталы, атын да судаарыстыба систиэмэлэрин кытта ситимнээн, наада түгэнигэр, ол дааннайы көрөр-истэр, бэрэбиэркэлиир кыах үөскүөҕэ.

Эспэримиэн тас дойду сорох көрүҥ олохтоохторун таарыйбат эбит. Сиһилии 2024 с. сэтинньи 7 күнүнээҕи РФ Бырабыыталыстыбатын 1510 №-дээх уурааҕар билсиэххэ сөп.