2025 сыл – Саха Өрөспүүбүлүкэтигэр Ийэ дойдуну көмүскээччи сыла

Ахсынньы 19 күнүгэр Ил Дархан Айсен Николаев Ил Түмэҥҥэ туһулааһыныгар кэлэр 2025 сылы Саха Өрөспүүбүлүкэтигэр Ийэ дойдуну көмүскээччи сылынан биллэрдэ.
Айсен Николаев бэлиэтээбитинэн, Саха сиригэр бүгүҥҥү күҥҥэ Аҕа дойду Улуу сэриитин 9 бэтэрээнэ олорор. «Бу саалаҕа анал байыаннай дьайыы кыттыылаахтара – Арассыыйа дьоруойдара, «Эр санаа» уордьанын, «Хорсунун иһин», «Бойобуой үтүөлэрин иһин» мэтээллэр кавалердара олороллор. Бүгүн биһиги кэккэбитигэр кэнэҕэски буойуттар – кадеттар бааллар... Кинилэр – Аҕа дойду көмүскэлигэр көлүөнэлэр ситимин кэрэһиттэрэ. Бу ситим өссө бөҕөргүүрүн, дойдуга таптал, бэриниилээх буолуу өссө күүһүрэрин туһугар 2025 сылы Ийэ дойдуну көмүскээччи сылынан биллэрэбин», – диэтэ Айсен Николаев. 
Өрөспүүбүлүкэ баһылыга былырыын Аҕа дойду сэриитин кыттыылаахтарыгар олохтообут 1 мөл. солк. кээмэйдээх биир кэмнээх төлөбүрү икки бүк улаатыннарарын эппитэ. Улуу Кыайыы 80 сылынан Саха сирин 13 тыһыынча олохтооҕугар төлөбүр оҥоһуллуоҕа, сэрии кыттыылаахтарын огдооболоругар, Ленинград блокадатын, концлааҕыр сиэртибэлэригэр, тыыл бэтэрээннэригэр, сэрии сылларын оҕолоругар төлөбүрдэр эмиэ улаатыахтара. 
Маны сэргэ Айсен Николаев бары муниципальнай оройуоннарга уонна куораттар олохтоох дьаһалталарыгар анал байыаннай дьайыы кыттыылаахтарын баһылыгы патриотическай иитиигэ солбуйааччынан аныырга сорудахтаата. 
«Анал байыаннай дьайыы кыттыылаахтарын күүстээх санааларын, дойдуга бэриниилэрин салайар үлэҕэ туһаныахха наада», – диэтэ  Айсен Николаев.

Оттон Ил Дархан уонна Быратыыталыстыба дьаһалтата, ыччат министиэристибэтэ кэлэр 2025 сылтан Инновационнай менеджмент Үрдүкү оскуолатын баазатыгар дойду баһылыга Владимир Путин көҕүлээбит «Дьоруойдар кэмнэрэ» федеральнай бырайыагын курдук каадырдары бэлэмниир бырагырааманы үлэлэтэргэ сорудахтаннылар. Ахсынньы 14 күнүгэр «Биир ньыгыл Арассыыйа» партия сийиэһигэр Владимир Путин ити бырайыагы регионнарга кэҥэтэргэ этии киллэрбитэ. 
«Биир даҕаны буойун, кини дьиэ кэргэнэ былаас болҕомтотун таһыгар хаалыа суохтаах. Олохторун толук уурбут буойуттар дьиэ кэргэттэрэ ураты болҕомтонон туһаныахтаахтар. Ити хас биирдии салайааччы быһаччы эппиэтинэһэ уонна хас биирдиибит ытык иэспит», – диэн эбэн эттэ Ил Дархан. Ол туһунан Ил Дархан уонна Бырабыыталыстыба пресс-сулууспата иһитиннэрэр.