«СоюзАвто»: маршруттарга киирбит уларыйыыларга уопуттаах суоппардар санаалара учуоттаммыта

Дьокуускай куорат уопсастыбаннай тырааныспарын эйгэтигэр 1993 сылтан үлэлиир «СоюзАвто» чааһынай тэрилтэ салайааччыта  Андрей Косицкай маршруттар сырыыларыгар киирбит уларыйыыларга өр сыл ыстаастаах уопуттаах суоппардар этиилэрэ бастакынан учуоттаммытын, тэрилтэ куорат дьаһалтатын кытта биир ситимҥэ үлэлиирин туһунан сэһэргиир:
– 2024 сыл ахсынньы ыйынааҕы туругунан 16 бэдэрээтчиттээхпит (бу иннинэ 18 этэ). Бу тэрилтэлэр холбоон 430 оптуобустаахтар, онно 300 суоппар үлэлиир. 200 курдук эбии наада. 
Олохтоох дьаһалтаны кытта биир баайыыга үлэлиибит. Пассажирдарга, нэһилиэнньэҕэ табыгастаах буоллун диэн. Холобура, ханнык эмэ маршрут салайааччыта айан-сырыы схеманы уларытар этиилээх таҕыстаҕына, куорат салалтатын кытта ону тэҥҥэ дьүүллэһэбит. Оптуобустар маршруттарыгар киирбит уларыйыыларга уопуттаах суоппардарбыт этиилэрэ бастакы уочарат учуоттаммыта. 
Сыллата куораппыт улаатан, кэҥээн иһэр. Ол курдук, холобура, куораты хааччыйыыга соторутааҕыта эрэ уонча эрэ маршрут баар буоллаҕына, билигин 18 маршрут сүүрэр. Онон куорат салалтата куораты, нэһилиэнньэни барытын уопсастыбаннай тырааныспар өҥөтүнэн хабар схеманы оҥороро сөп.
Оптуобустар пааркаларын саҥардыы үчүгэй эрэ түмүктэри аҕаларын билэ-көрө сылдьабыт. Онон, төһө даҕаны биһиги үлэбитигэр сыһыаннаах үҥсүү элбэх буоллар, үтүө да тыл аҕыйаҕа суох.
Нэһилиэнньэттэн киирэр үҥсүүлэри, этиилэри тутатына быһаарарга дьулуһабыт. Холобура, 5 №-дээх маршрукка ЯПАКтан икки улахан оптуобуһу эбэн, тыҥааһын уһулунна. 
Биһиги курдук тыйыс айылҕалаах, тиэхиньикэни үлэлэтэргэ уустук куоракка суоппардар, пассажирдар уонна салалта бары биир санаа тула түмүстэхпитинэ эрэ сатанар.
Олохтоох дьаһалта пресс-сулууспата