Маҕараска – уоланнар ааҕыылара

Алтынньы 11 күнүгэр Горнай улууһун Л.Н. Харитонов аатынан Маҕарас орто оскуолатыгар өрөспүүбүлүкэтээҕи Уоланнар ааҕыылара ыытылынна.

Төрөөбүт дойдуларыгар сүҥкэн кылааты киллэрбит туруу үлэһит дьон туһунан 34 кыттааччы сырдатта. Олор истэригэр биһиги оскуолабытыттан Давид Иванов (10-с «а» кылаас), Харысхан Алексеев (10-с «в» кылаас) ситиһиилээх кыттан кэллилэр.
Давид биһиги нэһилиэкпитигэр олорон ааспыт Үлэ Дьоруойа Трофимова Варвара Петровна холобурун толору арыйда. Варвара Петровна өр сылларга ыанньыксыттаабыт, тыа хаһаайыстыбата сайдарыгар үгүс сыратын уурбут үтүө-мааны киһибит. Бу үлэтин иһин Давид 2-с Үрдэл дипломунан наҕараадаланна.

Харысхан «Биир мэтээл остуоруйата» диэн үлэтинэн «Кэскиллээх ааҕааччы» анал аат хаһаайына буолла. Үлэтигэр сэрии ыар кэмнэригэр «1941-45 сс. Аҕа дойду Улуу сэриитин кэмигэр килбиэннээх үлэтин иһин» мэтээлинэн наҕараадаламмыт оскуола үөрэнээччилэриттэн биирдэстэрэ Кривогорницын Николай Дмитриевич туһунан кэпсээтэ. Николай Дмитриевич оҕо сааһыттан ыарахан үлэттэн чаҕайбакка, сааһырыар диэри сопхуоска тырахтарыыстаабыт ытык кырдьаҕаспыт этэ.
Уоланнар ааҕыыларын сүрүн ирдэбиллэрэ – үлэлэр төрөөбүт тылынан сырдатыллыахтаах этилэр. Үлэ ис хоһооно, үөһэ этиллибитин курдук, үлэһит дьону сырдатыы. Дьэ бу баар, маннык тэрээһин иитэр күүһэ. Үлэ дьонугар ытыктабылы, төрөөбүт дойдуга тапталы иитии.
Ааҕыылар Маҕарас орто оскуолатыгар өр сылларга дириэктэрдээбит РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна, 2015 с. Арассыыйаҕа 100 бастыҥ оскуола кэккэтигэр киирэн, «Бастыҥ дириэктэр-2015», «Улуус сайдыытыгар кылаатын иһин» бэлиэлэр, «Улуус бастыҥ салайааччыта» анал аат кыайыылааҕа, «Барҕарыы» пуонда стипендиата Кирилл Иванович Платонов сырдык кэриэһигэр ананнылар.
Тулагы оскуолатыттан үөрэнээччилэри кытары дириэктэр Д.В. Андросов, математика учуутала И.С. Иванова, оскуола музейын салайааччыта Н.Д. Кузьмина буолан сырыттыбыт. Тэрээһини иилээн-саҕалаан, үрдүк таһымнаахтык ыыппыт Маҕарас орто оскуолатын бары үлэһиттэригэр, дьүүллүүр сүбэҕэ, дириэктэр М.В. Максимовка махталбытын тиэрдэбит.