Үс оскуоланы бэдэрээтчиттэртэн атыылаһан ылыахтара

СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников киин куоракка тутуу тэрилтэлэрэ бэйэлэрин үптэринэн тутар үс оскуола дьиэтин бэрэбиэркэлээтэ.
Ол курдук, «ГлавСтрой» ХЭУо Саха политехническэй лицей салҕааһынын тутар, «Сэттэ» ТХ ХЭУо – Марха оскуолатын салҕааһынын, «Основа» ХЭУо – Птицефабрика дьоҕус оройуонугар Ягодкин аатынан 19 №-дээх оскуола эбии дьиэтин.
«Бары эбийиэктэргэ улахан тымныылар түһүөхтэрин иннинэ тас үлэ бүтэр туруктаах, түннүктэрин туруоран, сылааска холбонон, ис үлэҕэ, оборудованиелары таҥыыга киириэхтэрэ»,– диэн бэлиэтиир Дмитрий Садовников.

Вице-премьер быһаарарынан, бэдэрээтчиттэр бастаан бэйэлэрин үптэринэн тутар эбийиэктэрин кэлин атыылаһан ылыы механизма бу аан бастаан туттуллубат. Ол курдук, инники өттүгэр «Прометей» дьоҕус түөлбэ, Хатас оскуолалара, Пригород оскуолатын эбии дьиэтэ эмиэ маҥнай бэдэрээтчиттэр суоттарыгар тутуллубутун бэлиэтээтэ.
Дмитрий Садовников эбэн эппитинэн, бу үс оскуола дьиэтин кэҥэтии суотугар 1 тыһыынча үөрэх миэстэтэ эбиллиэхтээх. Ол түмүгэр Птицефабрика уонна Марха оскуолалара биир симиэнэнэн үөрэнэр буолуохтара, Саха политехническэй лицей киэҥиэҕэ, диэн иһитиннэрэр Ил Дархан уонна Бырабыыталыстыба пресс-сулууспата.