Киин куорат «Алгыстаах аартыга» арылынна

Киин куоракка Таалай күөл үрдүгэр өссө биир кэрэ-бэлиэ миэстэ арылынна.
Манна Саха АССР оскуолаларын 1990 сылга бүтэрбиттэр өрөспүүбүлүкэтээҕи уопсастыбаннай түмсүүлэрэ «Алгыстаах аартык» диэн сквери тутан, куорат олохтоохторугар, бары оскуоланы бүтэрээччилэргэ дьоһун бэлэҕи уунна.
Түмсүү бэрэссэдээтэлэ Алексей Петров бэлиэтииринэн, бырайыак олохтоох көҕүлээһиннэри өйүүр бырагыраама (ППМИ) көмөтүнэн олоххо киирбит. Тутуу бастакы түһүмэҕэр выпускниктар сквергэ кэлэр көлүөнэлэргэ суруктаах капсула укпуттар, онтуларын 2040 сыллаахха бэйэлэрэ оскуоланы бүтэрбиттэрэ 50 сылыгар хостуур былааннаахтар.

«Сквербит күннэтэ нэһилиэнньэ сөбүлээн сылдьар миэстэтигэр кубулуйарын көрөн, бырайыакпыт иккис түһүмэҕин быһыытынан тупсарыы, кэҥэтии үлэтин ыыттыбыт. Биһиги үөрүүбүтүгэр, үлэбит Ленин проспегын өрөмүөнүн кытта сөп түбэстэ»,– диир Алексей Петров.
Тэрийээччилэр «Алгыстаах аартык» кэнэҕэһин Санкт-Петербург куоракка ыытыллар «Алые паруса» тэрээһин курдук оскуоланы бүтэрээччилэр бырааһынньыктыыр сирдэрэ буолуон баҕараллар, диэн Олохтоох дьаһалта пресс-сулууспата иһитиннэрэр.