Арассыыйа таһымнаах күрэххэ кыайдылар

«Имена на улицах Якутска» – Дьокуускай куорат хас биирдии олохтооҕор, ыалдьыттарга даҕаны олус наадалаах ыйынньык – «Авторский знак» Арассыыйа таһымнаах күрэх «Ыйынньык» номинациятын кыайыылааҕа буолла.
Санатар буоллахха, күрэххэ 2022 сылга тахсыбыт Дьокуускай куорат уулуссаларыгар уонна нэһилиэктэригэр ааттара иҥэриллибит дьон туһунан 4-с ыйынньык кыайбыт. Ол курдук, күрэх «Краеведческие библиографические указатели», «Популярные издания», «Публикации краеведческих документов», «Сборники статей и докладов, монографии» номинацияларыгар Арассыыйа 57 регионуттан 172 сайаапка киирбит.

Оттон Арассыыйа таһымнаах бөдөҥ күрэх номинациятын кыайыылааҕынан ааттаммыт Нюргуяна Тихонова салайааччылаах бырайыак хомуйан таһаарааччылара: Дьокуускай куораттааҕы кииннэммит библиотека ситимин информационнай-библиографическай салаатын үлэһиттэрэ Алина Зедгенидзева, Мария Иванова, Татьяна Купоросова, Сардана Румянцева, Нюргуяна Тихонова; эрэдээктэрдэр – Мария Иванова, Саргылана Попова; дизайн, компьютернай верстка – Вера Кузьмина.
Ыйынньык 2022 сыллаахха Саха АССР 100 уонна Дьокуускай куорат 390 сылларыгар ананан тахсыбыта, диэн иһитиннэрэр Кииннэммит библиотека ситимэ.