Улуу Кыайыы 80 сылынан 110-тан тахса култуурунай тэрээһин былааннанар

Улуу Кыайыы 80 сылын Дьокуускай куорат сиригэр-уотугар бэлиэтээһиҥҥэ аналлаах уочараттаах мунньах сэрии кыттыылаахтарын аатын сүгэр уулуссаларга, пааматынньыктарга ыытыллыахтаах өрөмүөн хаамыытын о.д.а. үлэ былаанын дьүүллэстэ.
Куорат баһылыга Евгений Григорьев салайааччылаах 1941-1945 сс. Аҕа дойду Улуу сэриитигэр Кыайыы 80 сылын бэлиэтээһини тэрийэр кэмитиэт уочараттаах мунньаҕар туһааннаах тэрилтэлэр салайааччылара ыытыллыбыт үлэ сүнньүнэн отчуоттаатылар.
Ол курдук, Куорат хаһаайыстыбатын үлэлэтэр сулууспа салайааччыта Владимир Аммосов дьоруойдар уонна сэрии кыттыылаахтарын ааттарын сүгэр 29 уулуссаҕа, пааматынньыктарга өрөмүөн, көҕөрдүү үлэтэ ыытыллаары турарын билиһиннэрдэ. Маны сэргэ бэтэрээннэр олорор дьиэлэригэр мемориальнай дуоскалар ыйаныахтара диэтэ.
Куорат кылаабынай архитектора Семен Сергеев Кыайыы 80 сыллаах үбүлүөйүнэн киэргэтии концепциятын биир сүрүн тосхолунан 202-с түөлбэҕэ саҥа мурал оҥоһуллуохтааҕын иһитиннэрдэ.
Куорат баһылыгын солбуйааччы – Олохтоох дьаһалта аппараатын салайааччыта Руслан Тимофеев сүрүн тэрээһиннэргэ Кыайыы былааҕын көтөҕүү, пааматынньыктарга сибэкки дьөрбөтүн ууруу, миитин, бэтэрээннэр көрсүһүүлэрэ, кэнсиэртэр, быыстапкалар о.д.а. курдук 110-тан култуурунай тэрээһин былааннанарын иһитиннэрдэ. Үгэс буолбут тэрээһиннэри сэргэ ыччаты дойдумсах буоларга иитэр Оҕо параадын тэрийэр былаан баарын туһунан хаһыаппыт ааспыт нүөмэригэр суруйан турабыт.
Мунньах түмүгүнэн Кыайыы 80 сылын бэлиэтээһини тэрийэр хамыыһыйа бэрэссэдээтэлэ, куорат баһылыга Евгений Григорьев ыытыллар үлэлэр болдьохторун уонна хаачыстыбаларын кытаанах хотуруолга тутарга соруйда, диэн иһитиннэрэр Олохтоох дьаһалта пресс-сулууспата.