Спорт сонуннара
Спорт куттаах Сахабыт сиригэр физкултуура уонна спорт дьаһаллара сыл устата хараан көрбөккө ыытыллаллар. Бастыҥ спортсменнарбыт өрөспүүбүлүкэ таһынааҕы киэҥ, улахан түһүлгэлэртэн кыайыы, ситиһии көтөллөөх кэлэллэр.
Нижнэй Новгородка буолан ааспыт 100 км сүүрүүгэ Арассыыйа чемпионатыгар Амма уҥмат тыҥалаах быһыйа Надежда Бут (Сергеева) үрүҥ көмүс мэтээл хаһаайката буолла. Былырыын кыһыл көмүс мэтээли ылбыта. Александр Моедо эр дьоҥҥо төрдүс миэстэлэннэ.
Кемерово уобалаһыгар Кузбааска түмүктэммит “Шахтерская слава” норуоттар икки ардыларынааҕы көҥүл тустуу XI-с турнирыгар 61 кг Таджикистантан тустубут Айаал Белолюбскай – боруонса, 70 кг Чурапчы институтуттан Олег Фомин – кыһыл көмүс, 86 кг спорка үрдүкү маастарыстыба оскуолатыттан Андриан Ленскэй – үрүҥ көмүс, 97 кг Красноярскайтан кыттыбыт Максим Толмачев кыһыл көмүс мэтээллэри ылаттаатылар.
Екатеринбурга снайпинг диэн бойобуой сааларынан ыраахтан сыалы табыыга Бүтүн Арассыыйатааҕы турнирга бырааттыы Сергей уонна Семен Яковлевтар бастакы уонна иккис миэстэлэри ылаттаатылар. Былырыын Дьокуускайга аан бастаан тэриллибит күрэхтэһиигэ Сергей Яковлев эмиэ кыайыыны ситиспитэ. Бу сырыыга ол ситиһиитин хатылаата, 2 км ыраахтан сыалын табан, абсолютнай чөмпүйүөн үрдүк аатын ылла. Санатан эттэххэ, бырааттыы Яковлевтар норуот суруйааччыта Василий Семенович Яковлев-Далан сиэннэрэ.
Москва уобалаһыгар буолан ааспыт аан дойду дуобакка чемпионатыгар Европа, Америка, Азия, Африка 27 дойдуларын күүстээх дуобатчыттара кытыннылар. Сахабыт сириттэн Николай Стручков уонна Тунаара Федорова классическай бырагыраамаҕа аан дойду чөмпүйүөннэрин үрдүк ааттарын ылаттаатылар.
Эһиил Улуу Туймаадаҕа “Үс Хатыҥҥа” XXX-с төгүлүн ыытыллар “Дыгын оонньууларын” абсолютнай кыайыылааҕар туттарыллар сүрүн бириис кээмэйин Алексей Пинигин генеральнай дириэктэрдээх “Прогресс” ХЭТ 3 000 000 солк. диэри улаатыннарда. Бу тутуу тэрилтэтэ эһиил алтыс сылын спонсардыаҕа.
Саха сирин дуобатчыттара Арассыыйа чемпионатыттан түөрт кыһыл көмүс мэтээли аҕаллылар. Гаврил Колесов, Юлия Никанорова – классическай бырагыраамаҕа, түргэн оонньууга – Айсен Егоров, чаҕылҕанныы түргэн оонньууга Тунаара Федорова утарсааччыларын кыайталаатылар.
Татарстаҥҥа 6,5 тыһ. кыттааччыны түмпүт Казаньнааҕы полумарафоҥҥа 21 км сүүрүүгэ 1 чаас 16 мүн. 24 сөк. көрдөрүүлээх биэтэккэ кэлэн, Сунтаартан норуоттар икки ардыларынааҕы кылаастаах спорт маастара Наталья Леонтьева боруонса мэтээлинэн наҕараадаланна. 37 саастаах Наталья Леонтьева бу иннинэ аҕыйах хонуктааҕыта Арассыыйа чемпионатыгар 21 км марафоҥҥа иккис миэстэлэммитэ.
Минскэйгэ олимпийскай оонньуулар үс төгүллээх чөмпүйүөнэ Александр Медведь аатынан норуоттар икки ардыларынааҕы турнирга Белоруссияттан Арыйаан Тютрин 61 кг финалыгар Азербайджантан Европа призера Нураддин Новрузовы 6:5 баһыйа тутан бастаата, Тааттаттан Федор Постников 57 кг үһүс миэстэлэннэ.
Екатеринбурга доруобуйаларыгар хааччахтаах мөлтөхтүк көрөр спортсменнарга Арассыыйа пауэрлифтиҥҥэ чемпионатыгар Саха сириттэн 67 кг ыйааһыннаахтарга Игорь Созонов 117,5 кг көрдөрүүлээх чөмпүйүөн үрдүк аатын ылла.
Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников 2025 сыл от ыйын 1-6 күннэригэр Тааттаҕа буолар XXII-с “Манчаары оонньууларыгар” уонна 2027 сыл от ыйыгар Ньурбаҕа ыытыллар Саха сирин норуоттарын IX-с Cпортивнай оонньууларыгар бэлэмнэнии хаамыытын билистэ. Ытык Күөлгэ уонна Ньурбаҕа спортивнай-чэбдигирдэр, социальнай эбийиэктэри сэргэ, кыһыҥҥы чэпчэки атлетика манежтаах стадионнар, элбэх функциялаах спорт комплекстара тутуллуохтара. Манчаары оонньууларыгар спорт 11 көрүҥэр, Саха сирин норуоттарын оонньууларыгар спорт 15 көрүҥэр күрэхтэһиилэр буолуохтара.