Саха сиригэр аан бастаан Приемнай дьиэн кэргэн күнэ бэлиэтэннэ

Тэрийээччилэринэн СӨ Приемнай дьиэ кэргэттэрин ассоциацията (бэрэссэдээтэл Зояна Боронова) уонна Дьокуускай куорат приемнай дьиэ кэргэттэрин сэбиэтэ (бэрэссэдээтэл Жанна Нуриманова) буоллулар, диэн СӨ үлэ уонна социальнай сайдыы министиэристибэтин саайта иһитиннэрэр.
Тэрээһин Саха сиригэр тулаайах оҕону дьиэҕэ ылан иитии 35 сылыгар ананна. Бу күн өрөспүүбүлүкэ араас улуустарыттан – Үөһээ Бүлүүттэн, Бүлүүттэн, Кэбээйиттэн, Намтан, Хаҥаластан, Эдьигээнтэн, Өлөөнтөн, Булуҥтан уонна Дьокуумкай куораттан – приемнай дьиэ кэргэттэр иитиллээччилэрэ уонна төрөппүттэр муһуннулар.
Бэлиэтээн эттэххэ, 1989 сыл балаҕан ыйын 28 күнүгэр СӨ үөрэҕин министиэристибэтин уонна Нам оройуонун дьокутааттарын сэбиэтин ситэриилээх кэмитиэтин көҕүлээһиннэринэн өрөспүүбүлүкэҕэ аан бастаан оҕону дьиэҕэ ылан иитии саҕаламмыта. Төрүттээччилэринэн Николай Николаевич уонна Клара Иннокентьевна Матвеевтар дьиэ кэргэн буолбуттара. Мантан саҕалаан Саха сиригэр тулаайах оҕолору дьиэ кэргэҥҥэ иитэ ылыы саҕаламмыта.
Үлэ уонна социальнай сайдыы министиэристибэтин чахчытынан бүгүҥҥү күҥҥэ Саха Өрөспүүбүлүкэтигэр 232 приёмнай дьиэ кэргэҥҥэ 600 тулаайах уонна төрөппүт көрүүтэ-истиитэ суох оҕо иитиллэр. Бу ааспыт 35 сыл устата ситиһиилээхтик үлэлээн кэлбит приемнай дьиэ кэргэн институтун нөҥүө тыһыынчанан оҕо сылаас  сыһыаҥҥа, тапталга, бэйэҕэ, сарсыҥҥы күҥҥэ эрэлгэ иитиллэн таҕыста.
Приемнай дьиэ кэргэттэр бастакы бырааһынньыктарын бочуоттаах ыалдьыта, бастакы приемнай ийэ Клара Иннокентьевна Матвееваны бу күн үлэ уонна соуциальнай сайдыы министиэристибэтин демографическай политикаҕа, эпиэкэҕэ уонна бэпэчиитэлистибэҕэ департаменын салайааччытын солбуйааччы Лана Петрова, Нам улууһун дьаһалтатын бэрэстэбиитэллэрэ Ю.В. Дьяконов, Л.А. Зырянова, РФ үөрэҕириитин туйгуна, СӨ үтүөлээх учуутала С.С. Захарова эҕэрдэлээтилэр.
Оттон бастакы приемнай дьиэ кэргэттэр Тарабукиннар, Павловтар, Джуаловтар уонна Сивцевтэр СӨ приемнай дьиэ кэргэттэр ассоциацияларын Бочуоттаах грамоталарынан бэлиэтэннилэр. Бары приемнай дьиэ кэргэттэргэ үтүө баҕа санааларын СӨ приемнай дьиэ кэргэттэрин ассоциациятын салайааччыта, бэйэтэ алта оҕону иитэн олох киэҥ аартыгар үктэннэрбит приёмнай ийэ Надежда Корякина, Дьокуускай куорат Олохтоох дьаһалтатын эпиэкэҕэ салаатын начаалынньыгын солбуйааччы Розалия Акимова уонна приемнай дьиэ кэргэттэр куратордара Прасковья Никифорова анаатылар. 
Санатар буоллахха, Дьокуускай куоракка олорор Павловтар приемнай дьиэ кэргэн кыыстара Дайана Александровна быйыл алтынньы ыйга «Мы нужны друг другу» Бүтүн Арассыыйатааҕы приемнай дьиэ кэргэттэр форумнарыгар өрөспүүбүлүкэ чиэһин көмүскүү барарга бэлэмнэнэр. Эбэн эттэххэ, тэрээһини уопсастыбанньык Ольга Голдобина иилээн-саҕалаан ыытта, диэн иһитиннэрэр СӨ приемнай дьиэ кэргэттэрин ассоциацията.