«Арчы дьиэтэ» нэһилиэнньэнни саҥардыллыбыт дьиэҕэ көрсүөҕэ

Быйыл сайын «Арчы дьиэтэ» духуобунай култуура киинигэр хапытаалынай өрөмүөн ыытылынна.
Өрөмүөн бэдэрээтчитэ «Капитал-М» ХЭУо (генеральнай дириэктэр Ильин В.И) иһитиннэрбитинэн, үлэ от ыйыттан саҕаламмыт. Бүгүҥҥү күҥҥэ өрөмүөн 80%, ол иһигэр истиэнэтин саҥардыы, 3 куполу туруоруу, «Олонхо», «Эйгэ», «Арчы», сиэри-туому толоруу саалалара өрөмүөннэнэн бүппүт. Саалаларга мас муоста оннугар керамогранит ууруллубут. Вестибюль, көрүдүөр, библиотека, үлэһиттэр кабинеттара о.д.а. барыта саҥардыллыбыт. Биир сонун көстүүнэн киирэр аарка буолар. 
Куорат баһылыга Евгений Григорьев хапытаалынай өрөмүөн хаамыытын билсэн баран, «Арчы дьиэтэ» Духуобунай култуура киинэ сэтинньи ыйтан нэһилиэнньэни саҥардыллыбыт дьиэҕэ көрсөргө бэлэмин бэлиэтээтэ.

Тэрилтэ дириэктэрэ Лариса Андреева иһитиннэрбитинэн, «Арчы дьиэтэ» 2002 сыллаахха тутуллуоҕуттан хапытаалынай өрөмүөн ыытыллыбатах. Быйыл Олохтоох дьаһалта өйөбүлүнэн өтөрүнэн буолбатах баараҕай өрөмүөн ыытылла турар, диэн иһитиннэрэр Олохтоох дьаһалта пресс-сулууспата.