Мархаҕа Мелиоратордар уулуссаларын хапытаалынай өрөмүөнэ түмүктэнэн эрэр

«Куттала суох уонна хаачыстыбалаах суоллар» национальнай бырайыагынан Мархаҕа Мелиоратордар уулуссаларын хапытаалынай өрөмүөнэ түмүктэнэн эрэр. 
Эбийиэк устата 1,515 км, тутуу бэлэмэ – 87%.
Ол курдук, хаалбыт үлэлэргэ аспаалы ууруу, тротуары тэлгэтии, уулусса уотун тардыы, суол бэлиэлэрин туруоруу киирсэллэр. Маны сэргэ носуос ыстаансыйатын тимир турбатын оҥоруу ыытыллар. 
Санатар буоллахха, «Куттала суох уонна хаачыстыбалаах суоллар» нацбырайыагынан ааспыт 2023 сылга Дьокуускай куоракка 30 км кэриҥэ усталаах уулусса-суол ситимэ тутуллан, өрөмүөннэнэн турар. Оттон 2019 сылтан чуолаан бу бырайыагынан киин куоракка барыта 133 эбийиэккэ 164 км усталаах суол нуормаҕа хоруйдуур гына оҥоһуллубута.
Быйыл, 2024 сыл түмүгүнэн, куорат суолларын 80% ирдэбилгэ сөп түбэһэр таһымҥа тахсыахтаах, диэн иһитиннэрэр Олохтоох дьаһалта пресс-сулууспата.

Хаартыска: Олохтоох дьаһалта пресс-сулууспата