Баһылык тус приема сир, экология, суол өрөмүөнүн кыһалҕаларын тула буолла

Куорат баһылыга Евгений Григорьев уочараттаах тус приема сир учаастагын тыырыы, куорат экологиятын харыстааһын, уулусса-суол ситимин өрөмүөнэ курдук тыын суолталаах кыһалҕалары таарыйда. 
Ол курдук, анал байыаннай дьайыы кыттыылааҕын кэргэнэ Елена К. куорат баһылыгын тус приемугар сир-уот кыһалҕаларынан кэлэн, боппуруоһун хантан-туохтан саҕалаан туруорсарын туһунан сиһилии хоруйу ылла.
Куорат олохтооҕо Андрей К. Бүлүүлүүр аартык даачаларын суолун тупсарыы боппуруоһун көтөхтө. Үҥсээччи суолга өрөмүөн, оптуобус тохтобулларыгар сөргүтүү, күөл таһынааҕы даамбаҕа кумах кутуллара наадатын ыйда. Евгений Григорьев даачалар суолларын куорат балаансатыгар киллэрэн баран, көрүү-истии былааныгар киллэрэр наадатын бэлиэтээтэ. Оттон туһааннаах тэрилтэлэр оптуобус тохтобулларын тупсарыынан дьарыктанарга уонна даамбаҕа кумах кутарга чинчийии ыытарга сорудахтаннылар.
Сайсары күөл экологиятын харыстааһын кыһалҕата нэһилиэнньэ болҕомтотун кииниттэн тахсыбат. Ол курдук, Иван Б., күөл уута эмтээҕинэн, манна комплекснай чинчийии ыытыллара наадатын ыйда.
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).