Сыл тоҕус ыйыгар «Үйэ оҕолоро» тус сыаллаах хапытаал 7,5 тыһыынча дьиэ кэргэҥҥэ бэриллибит

Арассыыйаҕа буола турар Оҕо саас сылын ааспыт тоҕус ыйыгар Саха сиригэр 7 499 ыал «Үйэ оҕолоро» тус сыаллаах хапытаалы тутта, диэн үлэ уонна социальнай сайдыы министиэристибэтигэр иһитиннэрэллэр.

Санатар буоллахха, Ил Дархан Айсен Николаев дьаһалынан өрөспүүбүлүкэ 100 сылынан олохтоммут «Үйэ оҕолоро» тус сыаллаах хапытаал биэс сылга уһатыллан, 2022 сыл тохсунньу 1 күнүттэн саҕалаан 2027 сыл ахсынньы 31 күнүгэр диэри төрөөбүт оҕолорго барыларыгар бэриллэр. 2024 сылга «Үйэ оҕолоро» дьиэ кэргэн хапытаалын суумата индексация түмүгэр 110 тыһыынча солкуобайга тиийэн турар.
2024 сыл алтынньы 2 күнүнээҕи туругунан «Үйэ оҕолоро» дьиэ кэргэн хапытаалын туһаҕа таһаарыы сүрүн хайысхаларынан үгэс курдук олорор дьиэ усулуобуйатын тупсарыы (3 830 сайабылыанньа) уонна тырааныспар атыылаһыы буолаллар (963 сайабылыанньа).
Маны сэргэ 30 ыал «Үйэ оҕолоро» хапытаал харчытын бааҥҥа оҕо аатыгар уурунуу арыйан укпут, 24 ыал – кэтэх хаһаайыстыбаны сайыннарыыга туһаҕа таһаарбыт, 94 ыал — оҕону үөрэттэриигэ, 14 ыал – оҕоҕо үрдүк технологиялаах көмөнү оҥорууга, 18 ыал – дьиэ кэргэнинэн дойду иһигэр сынньаныыга, 6 ыал - гаас киллэртэриигэ, 1 ыал — оҕо доруобуйатын уонна олоҕун страховкалааһыҥҥа, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата. 

Хаартыска: СИА.