Суолу тутууга аныгы технологиялары тутталлар

Балаҕан ыйын 30 күнүгэр куорат баһылыгын солбуйааччы Антон Алексеенко «Россия 24» тэлэбиидэнньэ ханаалын «Куораты кытта быһа эпиир» биэриитигэр кытынна. Кэпсэтии биир сүрүн тиэмэтинэн «Хаачыстыбалаах уонна куттала суох суоллар» национальнай бырайыагынан уулусса-суол ситимин өрөмүөнэ буолла.
Быйыл «Хаачыстыбалаах уонна куттала суо суоллар» нацбырайыагынан уопсайа 21 эбийиэккэ үлэ ыытыллар. Антон Алексеенко иһитиннэрбитинэн, бүгүҥҥү күҥҥэ бары эбийиэккэ үлэ 65% бүтэн турар. Өрөмүөн үлэтэ алтынньы ыйынан түмүктэниэхтээх.
Антон Алексеенко чуолаан Сайсары түөлбэтигэр Макаренко уонна Притузов уулуссаларын өрөмүөнүгэр суолу оҥорооччулар анал технологияны туһаналларын бэлиэтээтэ. Ол курдук, ирбэт тоҥҥо дьайбат термоизоляционнай матырыйаал тутуллара ыйылынна. 
Санатар буоллахха, «Хаачыстыбалаах уонна куттала суох суоллар» нацбырайыагынан ааспыт 2023 сылга Дьокуускай куоракка 30 км кэриҥэ усталаах уулусса-суол ситимэ тутуллан, өрөмүөннэнэн турар. Оттон 2019 сылтан чуолаан бу бырайыагынан киин куоракка барыта 133 эбийиэккэ 164 км усталаах суол нуормаҕа хоруйдуур гына оҥоһуллубута.
Быйыл, 2024 сыл түмүгүнэн, куорат суолларын 80% ирдэбилгэ сөп түбэһэр таһымҥа тахсыахтаах. 

Хаартыска: Олохтоох дьаһалта саайтыттан