Сарсын бастыҥ учууталларга Ил Дархан бириэмийэтин туттарыахтара

2023 сылга буолан ааспыт Учуутал уонна уһуйааччы сылынан Саха Өрөспүүбүлүкэтин Ил Дархана Айсен Николаев 100 тыһ. солк. кээмэйдээх бириэмийэ олохтообута.

Быйыл бу бириэмийэҕэ куоластааһыҥҥа өрөспүүбүлүкэ 120 педагога киирбититтэн 36 бастыҥҥа сарсын, алтынньы 4 күнүгэр, 100 тыһыынча солкуобай туттарыллыаҕа. Учууталлары өйүүр атын дьаһалынан хоту уонна арктическай улуустарга 5 сыл үлэлээбиттэргэ олорор усулуобуйаны тупсарыыга социальнай төлөбүр оҥоһулларын ааттыахха сөп. 4 сыл устата маннык өйөбүлүнэн 103 учуутал (2023 сылга – 270) туһаммыт. Маны сэргэ 35-гэр диэри саастаах тыа сиригэр дуогабарынан үлэлии барар исписэлиистэргэ үс акылаат кээмэйдээх аадырыстаах көмө (подъемнай) оҥоһуллар. Маннык көмөнөн быйыл 314 учуутал туһаммыт (2023 сылга – 148).
Быйыл балаҕан ыйын 1 күнүттэн үс сылга диэри ыстаастаах эдэр учууталлар акылааттарыгар 75% надбавка ааҕыллар, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.