Петр Давыдов: «Сүрүн дьарыгым — уолаттарга эрэл биэрии»

Арассыыйа сүүмэрдэммит хамаандатын чилиэнэ, пауэрлифтиҥҥэ Европа уонна аан дойду чөмпүйүөнэ, спорт үтүөлээх маастара Владимир Балынец Кыргызстан киин куоратыгар Бишкеккэ түмүктэммит доруобай спортсменнарга Азия чемпионатыгар “классическай жим” эрчиллиигэ 59 кг кытынна уонна 176,5 кг штанганы сытан эрэ өрө анньыыга Азия чөмпүйүөнэ буолла уонна аан дойду рекордун олохтоото!

Күүстээх спортсмены Ньурба Чуукаарыттан төрүттээх-уустаах Петр Николаевич Давыдов эрчийэр. Уопуттаах тренер бэйэтин кэмигэр өбүгэ оонньууларынан уонна хотугу многоборьенан дьарыктанан, 600 наартаны нөҥүө ойору ситиспит спорт маастара. Профтехучилищеҕа тыраахтары үөрэппитэ, дириэктэрдээбитэ. Инбэлииттэргэ тренердээбитэ. Маҥнайгы бастыҥ иитиллээччитэ Владимир Балынец аан дойдуга бастаабыта, Лондоннааҕы Паралимпиадаҕа үрүҥ көмүс призер буолбута. Петр Дмитриевич 20 сыл тренердиир үлэтигэр мас тардыһыытыгар аан дойду үс төгүллээх чөмпүйүөнэ Дмитрий Попову, аан дойду Кубогын кыайыылааҕа Эрчим Баппаҕайы, өбүгэ оонньууларын күүстээх многобореһа, “Дыгын оонньууларын” призера Владимир Федоровы дьарыктыыр. Үгүс иитиллээччилэрэ диискэни, копьену быраҕыыга, дьаадыраны анньыыга Арассыыйа чөмпүйүөннэрэ, призердара.

Паралимпийскай, Сурдлимпийскай оонньуулар, Арассыыйа, Азия, Европа, аан дойду чөмпүйүөннэрин уонна призердарын иитэн-бэлэмнээн таһаартыыр Арассыыйа үтүөлээх тренерэ Петр Николаевич Давыдовка “Арассыыйа физическэй култуураҕа үтүөлээх үлэһитэ” үрдүк аат иҥэрилиннэ. Дойду бэрэсидьиэнэ Владимир Путин илии баттааһыннаах дастабырыанньаны уонна бэлиэни Саха Өрөспүүбүлүкэтин Аҕа Баһылыга Айсен Николаев туттарда.

Петр Давыдов:

- Спортивнай сылы этэҥҥэ түмүктээтибит. Миэхэ эрчиллэр оҕолор 14 кыһыл уонна биир үрүҥ көмүс мэтээли аҕаллылар. Онон сүргэм көтөҕүллэн сылдьабын. Бишкек куоракка балаҕан ыйын 24-29 күннэригэр буолан ааспыт Азия чемпионатыгар эмиэ үрдүк ситиһиилээхтик кытынныбыт. Владимир Балынец 59 кг 176,5 кг өрө анньан, Азия кыайыылааҕа буолла. Маны таһынан, Азия эр дьонугар барытыгар абсолютнай чөмпүйүөн үрдүк аатын ылла. Сытан эрэ өрө анньыыга бэйэтин ыйааһыныгар аан дойду рекордун олохтоото. Бэйэтин ыйааһыныттан үс төгүл элбэҕи өрө аста! Кини сүрдээх дьулуурдаах, режими, диссипилиинэни тутуһар спортсмен. Ол түмүгэр сүүрбэ сыл тухары Арассыыйаҕа кимиэхэ да иннин биэрбэккэ сылдьар, доруобай спортсменннары эмиэ кыайталыыр. Даҕатан эттэххэ, быйыл муус устарга Тула куоракка буолбут Арассыыйа чемпионатыгар сытан эрэ штанганы өрө анньыыга бастаабыта уонна абсолютнай чөмпүйүөн буолары ситиспитэ. Доруобайдары кыайталаан. Инньэ гынан, үлэбит түмүктээх буолбутуттан, өссө күүскэ мотивацияланаммыт, өссө ыарахан ыйааһыннары ылыахпытын баҕарабыт.

Устудьуоннары дьарыктаабытым ыраатта. Ол иһигэр мас тадыһыытыгар Саха сирин 11 төгүллээх чөмпүйүөнэ Дмитрий Попов Арассыыйаҕа сэттэтэ бастаата, аан дойдуга үстэ чөмпүйүөннээтэ. Билигин эмиэ Бишкеккэ сэтинньигэ буолар аан дойду чемпионатыгар барардыы дьарыктана сылдьабыт. Уонна Саха сирин сэттэ, Арассыыйа, Европа иккилии төгүллээх чөмпүйүөнэ, Европа абсолютнай кыайыылааҕа Эрчим Баппаҕай баар. Ахсынньыга Европа чемпионатыгар бараары бэлэмнэнэр. Саамай ыарахан “супертяж” ыйааһыннаахтарга Арассыыйа чөмпүйүөнэ, Өлүөхүмэ күүстээҕэ Евгений Попов аан дойду чемпионатыгар бараары сылдьар.  Дьарык методикатыгар туох да кистэлэҥ суох. Дьарыктыыр дьоммуттан кытаанах спортивнай режими, диссипилиинэни ирдиибин уонна бэйэм холобур буолабын. Хас биирдии тренер бэйэтэ спецификалаах, дьарыктыыр методикалаах буолуо. Мин сүрүн дьарыгым – уолаттарга эрэл биэрии. Бастаан эт-сиин күүһүн биэрэбин, онтон, дьэ, ситиһии. Кэлэр спортивнай сылга өссө улахан кирбиилэри ылаары, ону толкуйдаан, аттаран, былаанныы олоробун.

Арассыыйа үтүөлээх тренерэ уонна Арассыыйа физическэй култуураҕа үтүөлээх үлэһитэ Петр Николаевич Давыдовы эҕэрдэлиибит, аны да кыайыылары уһанса турарыгар баҕарабыт!