Норуот маастардарын өйүүр судаарыстыбаннай концепция бигэргэтилиннэ
Ил Дархан Айсен Николаев сорудаҕынан өрөспүүбүлүкэ бырабыыталыстыбата 2033 сылга диэри норуот уус-уран оҥоһуктарын судаарыстыбаннай өйөбүл концепциятын оҥорон бигэргэттэ, диэн иһитиннэрэр Ил Дархан уонна Бырабыыталыстыба пресс-сулууспата.
Концепция сыала – нэһилиэнньэни уус-уран оҥоһук эйгэтигэр сыһыаран, норуот үгэс буолбут сыаннастарын харыстааһын. Ылыллыахтаах дьаһаллар ортолоругар үрдүк квалификациялаах каадырдары бэлэмнээһин, сырьенан, онтон да атын наадалаах туттар тэрилинэн хааччыйар биир кэлим пуонданы тэрийии, Норуот айымньытын дьиэлэрин салгыы тэрийии о.д.а. бааллар.
Бүгүҥҥү күҥҥэ Норуот айымньытын дьиэлэрэ Чурапчы улууһугар Чурапчыга, Уус Алдан улууһугар Бороҕоҥҥо (филиаллара Сыырдаахха, Бээрийэҕэ), Мэҥэ Хаҥаласка Майаҕа, Бүлүү оройуонугар Бүлүү куоратыгар уонна Дьокуускай куоракка Хатаска бааллар.
2023 сыл саҥатыгар өрөспүүбүлүкэҕэ «Норуот маастара» анал ааттаах 275 киһи баара биллэр, ону сэргэ 606 уус-уран оҥоһук маастара регистрациялаах.
Бэлиэтээн этэххэ, 2023 сыл сэтинньи 1 күнүттэн Ил Дархан бастыҥ уустарга ый аайы 30 тыһ. солк. кэмэйдээх истипиэндьийэни анаабыта.
Сонуннар
Ордук ааҕаллар
