15.06.2023 | 14:00

Массыанньыктар олохтоох баан аатыттан эрийэллэр

Массыанньыктар олохтоох баан аатыттан эрийэллэр
Ааптар: Розалия Томская
Бөлөххө киир

Ааспыт нэдиэлэҕэ Дьокуускай олохтоохторо – 19 саастаах устудьуон, 58 саастаах консьерж уонна 26 саастаах харабылынын  үлэлиир эдэр киһи – олохтоох баан үлэһиттэринэн кубулунан эрийбит массыанньыктар угаайыларыгар киирэн, уопсайа мөлүйүөн аҥаарыттан тахса солкуобай харчыларыттан маппыттар.  Ол туһунан СӨ Ис дьыалаҕа министиэристибэтин пресс-сулууспата иһитиннэрэр уонна массыанньыктар Саха сирин олохтоохторугар киэҥник биллэр баан аатыттан кытта эрийэр буолбуттарын туһунан сэрэтэр.

Бу үөһэ ахтыллыбыт үс киһини барыларын биир схеманан албыннаабыттар: бассаабынан эрийэллэр эбит, онуоха олохтоох баан логотиба көстө сылдьар буолан, дьон улгумнук итэҕэйбит. Уурунуу харчыларын харыстыыр, уоруйахтартан куоттарар сыаллаах «Rustdesk» сыһыарыыны төлөпүөннэригэр киллэрбиттэр.

Бу сыһыарыы көмөтүнэн массыанньыктар счеттарын ып-ыраастык сотон ылбыттар. Устудьуон аатыгар массыанньыктар 300 тыһыынча солкуобайга кирэдьиит ылбыттар, оттон консьерж уонна харабыл уурунуу харчыларыттан олоччу маппыттар.

Полиция үлэһиттэрэ өссө төгүл сэрэтэллэр: баан үлэһиттэрэ хаһан да бассаабынан эрийбэттэр, социальнай ситимнэринэн массыанньыктар эрэ эрийэллэр!

 

Нерюнгри олохтооҕо туга да суох хаалбыт

63 саастаах Нерюнгри куорат олохтооҕо +79005157972 нүөмэртэн эрийбит массыанньыктарга албыннаппыт.

Төлөпүөнүнэн эрийбит кыыс Арассыыйа Силиэстийэлиир кэмитиэтин силиэдэбэтэлэ буоларын эппит уонна кырдьаҕас толору аатын-суолун, пааспарын дааннайын барытын ала-чуо этэн тобугураппыт, ол иһин эр киһи итэҕэйэргэ күһэллибит. Биэнсийэлээххэ кинини судаарыстыбаны таҥнарыыга буруйдаан эрэллэрин, каартатыттан террористическай тэрилтэлэргэ харчы ыыппытын эппит. Эр киһи уолуйан хаһан да оннук гымматаҕын этэ сатаабыт, онуоха кыыһа “оччоҕуна эн счеккуттан баан үлэһиттэрэ харчы ыыта олороллор эбит” диэннээх буолбут.

Ол кэннэ эр киһи массыанньыктар сорудахтарын барытын толорбут: бааҥҥа тиийэн 200 тыһ. солк. кирэдьиит ылбыт уонна этиллибит счекка ыыта охсубут.

Ытыктабыллаах Саха сирин олохтоохторо! Билбэт нүөмэргититтэн бассаап уонна телеграмм нөҥүө эрийэллэрин ылымаҥ. Массыанньыктар араас төрүөтү барытын туһаналлар, тугу барытын тобулаллар. Счеккутугар харчыгыт суох да буоллаҕына, баантан баран кирэдьиит ылбыккытын бэйэҕит да билбэккэ хаалыаххытын сөп диэн ИДьМ иһитиннэрэр.

 

Дьиҥнээх бааннар эрийбэттэр

Бэс ыйын саҥатыгар 57 саастаах эр киһиэхэ Москваҕа баар баан үлэһиттэрэ эрийбиттэр уонна кини каартатыттан массыанньыктар кирэдьиит ылан эрэллэрин иһитиннэрбиттэр. “Ону тохтотор туһугар каартаҥ дааннайын уонна смс-һынан кэлбит коду эт”, — диэбиттэрин эр киһи толоро охсубут. Салгыы счет нүөмэрин эппиттэр уонна туох баар харчытын барытын онно ыытарыгар “сүбэлээбиттэр”. Биэнсийэлээх киһи 34000 солкуобайыттан матаахтаабыт.

Оттон 69 саастаах слесарьга эрийэн кэлбит “баан үлэһитэ” кини аатыттан кирэдьиит ылан эрэллэрин, ону бопсор туһугар кини харчытын барытын “куттала суох счекка ыытыахтааҕын” этэн туран, биэнсийэлээхтэн 186 100 солк. уурунуу харчытын сойбоппут.

Баан үлэһиттэрэ эн каартаҕыттан кирэдьиит ылан эрэллэрин туһунан суһал иһитиннэриилээх хаһан да эрийбэттэр. Маннык сонунунан массыанньыктар эрэ өмүрдэллэр, кинилэр эрийдилэр да, кэпсэтэ барбакка, төлөпүөҥҥүтүн арааран кэбиһэр буолуҥ.

Сонуннар

Ордук ааҕаллар

Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...
Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
Элбэх оҕолоохторго — ураты болҕомто
Сонуннар | 06.06.2024 | 16:00
Элбэх оҕолоохторго — ураты болҕомто
2024 сыл ыам ыйын 28 күнүгэр ыытыллыбыт Ил Түмэн сэттис (уочараты таһынан) пленарнай мунньаҕар норуот дьокутааттара «Саха Өрөспүүбүлүкэтигэр элбэх оҕолоох ыал статуһун туһунан» өрөспүүбүлүкэ сокуонугар уларытыылары киллэриини өйөөтүлэр.   Санатан эттэххэ, дойду баһылыга Владимир Путин 2024 сыл тохсунньу ыйыгар элбэх оҕолоох дьиэ кэргэттэр статустарын болдьоҕо суох оҥорбута. Ол эбэтэр үс уонна...