Ил Дархан «Кыайыы поеһа» быыстапка-музей тэрийээччилэригэр махталын биллэрдэ

«Кыайыы поеһа» бырайыак көҕүлээччилэригэр уонна тэрийээччилэригэр махталбын тиэрдиэхпин баҕарабын. Ураты, историческай чахчыларга олоҕуран оҥоһуллубут экспозиция музей көрөөччүлэригэр Аҕа дойду Улуу сэриитин сылларын тыынын тириэрдэр. Ааптардар маастарыстыбаларынан,  кинилэр интерактивнай быыстапка аныгы технологияларын туттубуттарын көмөтүнэн, музей ыалдьыттара  патриотизм, көҥүл иһин охсуһуу, Ийэ дойдуга бэриниилээх таптал  эйгэтигэр киирэллэр, ол суостаах сылларга кыттыһаллар. «Кыайыы поеһа» Аҕа дойду көмүскээччилэрин туһунан үйэлээх өйдөбүлү харыстыырга уонна бөҕөргөтөргө көмөлөһөр, саҥа көлүөнэ дьоҥҥо сэбиэскэй норуот хорсун быһыытын туһунан кырдьыгы тиэрдэр. Бу 2025 сылга бэлиэтэниэхтээх Улуу Кыайыы 80 сылын көрсө ордук дьоһун суолталаах», - диир Айсен Николаев.

Балаҕан ыйын 28 күнүгэр диэри көһө сылдьар музейга Аллараа Бэстээх олохтоохторо сырыттылар, кинилэргэ «Кыайыы поеһын» 280-с тохтобула буолла.

Аҕа дойду Улуу сэриитин көһө сылдьар музейа балаҕан ыйын 29 күнүгэр Алдаҥҥа, балаҕан ыйын 30 күнүттэн алтынньы 2 күнүгэр диэри Нерюнгри куоракка сырытта.

«Кыайыы поеһа» – 150 фигуралаах аан дойдуга бастакы инверсивнай музей. Кини, 2020 сыл алтынньы ыйыгар Москва куорат Белорусскай вокзалыттан айаҥҥа турунан, 19 регион 170 куоратыгар сырытта. Быыстапканы биир мөлүйүөнтэн тахса киһи көрдө-иһиттэ.