Евгений Григорьев Гагарин уокуругар ыытыллар үлэни бэрэбиэркэлээтэ

Бэҕэһээ, бэс ыйын 8 күнүгэр, баһылык Евгений Григорьев VIII-с «Азия оҕолоро» Оонньууларга бэлэмнэнии чэрчитинэн Гагарин уокуругар сырытта. 
«Ворота Якутска», Ю.А. Гагарин аатынан сквер курдук уопсастыбаннай туоналар, Кузьмин уул., 10 уонна 14, Можайскай уул., 17/8 дьиэлэрин тиэргэннэригэр ыытыллар үлэлэр, Можайскай уулуссатын өрөмүөнэ болҕомто киинигэр турдулар. 
«Ворота Якутска» уопсастыбаннай туонаҕа Евгений Григорьев көҕөрдүү, тупсарыы үлэлэрин, эбийиэктэр туруктарын бэрэбиэркэлээтэ. Ю.А. Гагарин аатынан сквергэ дьоҕус архтектурнай оҥоһуктарга бытархай өрөмүөн уонна көҕөрдүү үлэтэ ыытыллар.

«Главстрой» МХТ салайааччыта Алексей Варламов иһитиннэрбитинэн, Можайскай уулуссатын уларытан оҥорууга бу күннэргэ сүрүн күүс «Сулус» чэбдигирдэр комплекска диэри суолга уонна суол кытыытын тупсарыыга туһаайыллар. Тутааччылар былааннаах үлэлэрин бэс ыйын 18 күнүгэр диэри түмүктүүр соруктаахтар.
Ити кэнниттэн ГАИ поһуттан Мархаҕа киирэр стелаҕа диэри кэрчиккэ түһүнэллэр. Туймаада ыһыаҕар диэри манна грейдердээһин, кальций хлоридын туһанан быылы хаптатыы үлэлэрэ ыытыллыаҕа.
Ураты болҕомто тиэргэни тупсарыы хаамыытыгар уурулунна. Кузьмин, 10, 14, Можайскай, 17/8 аадырыстар тиэргэннэрин тупсарыы бырайыага бэлэм. Бырайыакка уу халдьалара, оҕо балаһааккалара, баскетбол оонньуур сир, сынньалаҥ зоната, күнтэн хаххалаах ыскамыайкалар, массыына туруорар миэстэ, бөх тоҕор балаһаакка, воркаут-комплекс, тренажердар баар буолуохтара. Көҕөрдүү үлэтэ, тротуар эмиэ умнуллубатахтар.
Гагарин уокуругун управатын салайааччыта Евгений Сидоренко иһитиннэрбитинэн, ааспыт сылларга уокурукка номнуо 18 тиэргэҥҥэ тупсарыы үлэтэ ыытыллыбыт (2022 сыл – 15, 2023 сыл – 3), диэн иһитиннэрэр Олохтоох дьаһалта пресс-сулууспата.