Дьокуускайдааҕы «Юнармия дьиэтэ» Арассыыйаҕа бастыҥынан ааттанна

Дьокуускай куорат Клара Цеткин уулуссатын, 14/3 нүөмэрдээх дьиэтигэр үлэлиир эдэр армеецтары бэлэмниир киин Арассыыйаҕа бастыҥ үлэлээҕинэн ааттанна.
Дойду үрдүнэн эдэр армеецтары бэлэмниир хамсааһын тэриллибитэ сэттис сылынан Бүтүн Арассыыйатааҕы «ЮНАРМИЯ – СемьЯ» форум ыам ыйын 26 - 29  күннэригэр Москва уобалаһыгар буолан ааста. Форумҥа Арассыыйа 84 субъегыттан 600 эдэр армеец уонна уһуйааччы кыттыыны ылбыт. Оттон Саха Өрөспүүбүлүкэтин дэлэгээссийэтин састаабыгар Дьокуускай куораттан «Лидеры ЮНАРМИИ» регионнааҕы түһүмэх кыайыылаахтара Дэвид Слепцов, Д. Г. Новопашин аатынан 10 №-дээх оскуола «Отвага-10» этэрээтэ, уонна Антон Потапов, Марха 1№-дээх оскуолатын «Городской патруль» этэрээтэ, кыттыыны ыллылар. 
Оттон Дьокуускай куораттааҕы «Юнармия дьиэтэ» 28 хамаандаттан бастыҥ үлэлээҕинэн ааттанан, «Лучший Дом «ЮНАРМИИ» күрэх кыайыылааҕа буолла. 
Дьокуускай куораттааҕы эдэр армеецтары бэлэмниир киин «Городской патруль» кулуубун салайааччыта Наталья Колмогорова иһитиннэрбитинэн, икки сыл иһигэр киин куорат 3 уонна 25 №№-дээх оскуолаларыгар икки кылаас арыллыбыт, нэһилиэктэргэ 25 этэрээт тэриллэн, эдэр армеецтар хамсааһыннарынан киин куорат 941 үөрэнээччитэ хабыллыбыт. Оҕолор бу хамсааһын иитинэн байыаннай, строевой, огневой бэлэмнэниини ааһаллар, медкөмөнү оҥорорго үөрэнэллэр, кыраайы үөрэтии, туризм, бырайыактарынан үлэ, волонтердааһын, айар дьоҕур уонна медиаүөрэхтээһин дьарыктарыгар сылдьаллар. 
«Городской патруль» кулууп чилиэнэ Никита Попов:
- Биһиги манна лидердыы хаачыстыбабытын сайыннарабыт, онуоха наадалаах музыкальнай саала, строевой бэлэмнэнии саалата, электроннай тир, медиа, компьютернай кылаастар барыта бааллар. Калашников аптамаатын, балаакканы ыһарга-хомуйарга үөрэнэбит.
«Городской патруль» Антон Потапов:
- Волонтердааһынынан күүскэ дьарыктанабыт, сэрии сылларын оҕолоругар, кырдьаҕас учууталларга көмөлөһөбүт. Кулун тутар ыйга мин «Лидер ЮНАРМИИ» күрэххэ кыайан, Москваҕа буолан ааспыт форумҥа кыттан кэллим. Дьокуускай куораттааҕы Эдэр армеецтары бэлэмниир дьиэбит Арассыыйаҕа бастыҥынан ааттаммытыттан олус үөрдүбүт.