191 киһи коронавирустаата

Ааспыт сууккаҕа Саха сиригэр 191 киһи коронавирустаата. Бу туһунан суһал штаб салайааччытын солбуйааччы Ольга Балабкина иһитиннэрдэ.

Саҥа ааҕыынан Дьокуускайга 104, Алдаҥҥа, Мэҥэ Хаҥаласка, Бүлүүгэ, Ньурбаҕа, Өлүөхүмэҕэ, Нерюнгригэ уончалыы киһи ыарыйда. Ону таһынан, Намҥа, Ленскэйгэ, Чурапчыга — биэстии киһи, Сунтаарга, Тааттаҕа — түөртүү киһи, Анаабырга, Дьааҥыга, Горнайга — үстүү киһи, Аллайыахаҕа, Булуҥҥа, Эдьигээҥҥэ, Өймөкөөҥҥө, Уус Алдаҥҥа — иккилии киһи, Кэбээйигэ, Өлөөҥҥө, Усуйаанаҕа, Хаҥаласка — биирдии киһи.

Ааспыт сууккаҕа икки киһи тыына быстыбыт. Өрөспүүбүлүкэ лабораторияларыгар 4 265 анаалыс оҥоһуллубут.