Уопсастыбаннай палаата түөлбэнэн салайынан олорууну сайыннарыыга аналлаах төгүрүк остуолу ыытта

Куорат уопсастыбаннай палаатата түөлбэлэр (ТОС) салайааччыларын кытта бу ньыманан салайынан олорууну сайыннарыыга аналлаах төгүрүк остуолу ыытта.
Уопсастыбаннай палаата бэрэссэдээтэлэ Матвей Лыткин, Олохтоох дьаһалта Территориялары кытта үлэҕэ департаменын салайааччыта Светлана Кармадонова салайааччылаах мунньахха куорат ТОСтарын бэрэссэдээтэллэрэ кыттыыны ыллылар.
Светлана Кармадонова иһитиннэрбитинэн, Дьокуускай куораты 2032 сылга диэри сайдыытын Стратегиятыгар сыл аайы биэстэн итэҕэһэ суох түөлбэ (ТОС) тэриллиэхтээҕэ былааннаммыт. 
«Бүгүҥҥү күҥҥэ Дьокуускай куоракка 8 түөлбэ тэриллэн турар, сыл бүтүөр диэри бу ахсаан 10 тиийиэҕэ. Куорат олохтоохторо маннык ньыманан салайынан олоруу табыгастааҕын өйдөөн эрэллэр», - диэн бэлиэтээтэ уонна ТОСтар үлэлэрин-хамнастарын сүрүннүүр сокуоннары, нуорма-быраап аакталарын сиһилии билиһиннэрдэ.
ТОСтар ыытар үлэлэрин үбүлээһин чааһыгар Светлана Кармадонова Ил Дархан уонна Куорат баһылыгын граннарыгар кыттыы туһунан кэпсээтэ.
Ол курдук, Дьокуускай куорат быйыл ыам ыйыгар Ил Дархан граныгар кыайыылаах тахсан, 2 мөл. солк. тахса суумалаах субсидияны ылары ситиспитин бэлиэтээтэ. Ону сэргэ бэс ыйыгар киин куоракка биллэриллибит 5 мөл. солк. суумалаах Куорат баһылыгын гранын 3 мөл. солк. тахсата олохтоох бүддьүөттэн тыырылларын иһитиннэрдэ. Ол эбэтэр куорат дьаһалтата ТОСтар бырайыактарын олоххо киллэрэргэ, нэһилиэнньэҕэ табыгастаах усулуобуйаны тэрийэргэ дьоһун өйөбүлү оҥороро бэлиэтэннэ. 
Көрсүһүү кыттыылаахтара ТОС төһө ситиһиилээхтик дьаһанан олороро хас биирдии чилиэниттэн, нэһилиэнньэ көҕүттэн, үөскүүр кыһалҕалары быһаарарга тус кылаатын киллэрэргэ бэлэмиттэн тутулуктааҕын бигэргэттилэр.
Төгүрүк остуол үлэлии олорор түөлбэлэр иннилэригэр турар соруктарын, кыһалҕаларын быһаарарга, уопут атастаһарга дьоһун балаһаакка буолла, диэн иһитиннэрэр Олохтоох дьаһалта пресс-сулууспата.