Тулагыга «Икки булчут» скульптура баар буолла

Баай Байанай ыйыгар түбэһиннэрэн, сэтинньи 9 күнүгэр Тулагы Киллэм нэһилиэгэр «Икки булчут» пааматынньык үөрүүлээх арыллыытын Тулагы оскуолатын үөрэнээччилэрэ киинэҕэ устаннар, сурукка тиһэннэр, нэһилиэк биир бэлиэ түгэнин үйэтиттилэр.

Муниципальнай хантараак чэрчитинэн боруонсаттан кутуллубут скульптурнай композиция ааптарынан Арассыыйа худуоһунньуктарын сойууһун чилиэнэ Роман Викторович Босов буолар.
Композицияҕа уончалаах уолчаан убайын таҥаһын кэтэн, бобуччу курданан баран, булдун кыҥыы турдаҕына, ох саатын оноҕоһун тумсугар булдун туппут чыычаах кэлэн олорор. Кырачаан булчут көтөр кынаттаах булчукка аралдьыйан, ону көрө турара – булчут дьону толкуйдатар ис хоһоонноох. 
Оттон бырайыак ааптарынан Лена Седелкова буолар. Лена Леонидовна дойду култуурунай эйгэтин олохтооһуҥҥа искусство уҕараабыт оруоллааҕын бэлиэтиир. «Бу скульптура биһиги нэһилиэкпит биир кэрэ миэстэтэ эрэ буолбакка, булт, доҕордоһуу, айылҕалыын, тыынар тыыннааҕы кытта или-эйэни олохтооһун, сомоҕолоһуу бэлиэтэ буолар аналлаах»,  – диир кини. 

Тэрээһиҥҥэ Саха Өрөспүүбүлүкэтин Бырабыыталыстыбатын бэрэссэдээтэлэ Сергей Местников, Арассыыйа юристарын Саха сиринээҕи ассоциациятын бэрэссэдээтэлэ Александр Ким-Кимэн, Саха Өрөспүүбүлүкэтигэр ох саанан ытыы федерациятын бэрэссэдээтэлэ Виктор Бурцев кыттыыны ыллылар, бочуоттаах ыалдьыт буоллулар уонна култуура уонна искусство норуоту иитиигэ дириҥ суолтатын бэлиэтээтилэр. 
«Икки булчут» скульптурнай композиция номнуо нэһилиэнньэ болҕомтотун тарта, олохтоохтор сөбүлээн дьаарбайар, хаартыскаҕа түһэр миэстэлэригэр кубулуйда. Ол аата искусство норуоту сомоҕолуур аналын толорон эрэр, диэн иһитиннэрэллэр П.И. Кочнев аатынан Тулагы-Киллэм нэһилиэгин агро-оскуолатын юнкордара.