«Арчы дьиэтэ» духуобунай култуура киинэ өрөмүөн кэнниттэн арылынна

Сэтинньи 15 күнүгэр 2002 сыллаахха арыллыаҕыттан өрөмүөннэммэккэ турбут Дьокуускайдааҕы «Арчы дьиэтэ» духуобунай култуура киинэ Олохтоох дьаһалта өйөбүлүнэн бу сайын саҕаламмыт хапытаалынай өрөмүөн кэнниттэн арылынна.
Ол курдук, «Олоҥхо», «Эйгэ», «Арчы», сиэр-туом саалаларыгар мас муоста оннугар аныгылыы керамогранит тэлгэннэ, куполлар саҥардылыннылар, көрүдүөргэ, библиотекаҕа, исписэлиистэр кабинеттарыгар, атын хосторго барытыгар өрөмүөн ыытылынна. Маны сэргэ киирэр арка, тиэргэни тупсарыы үлэтэ ыытыллыбыт (бэдэрээтчит - Вячеслав Ильин салайааччылаах «Капитал -М» ХЭУо).
Куорат баһылыга Евгений Григорьев бу бэлиэ күнүнэн бэйэтин эҕэрдэ тылыгар саҥалыы тыыннаммыт «Арчы дьиэтэ» култуура, духуобунас тэрээһиннэрин эрэ ыытар буолбакка, баҕалаахха барытыгар сынньанар, иэйии ылар бэлиэ миэстэтэ буолар кыахтааҕын эттэ, диэн иһитиннэрэр Олохтоох дьаһалта пресс-сулууспата.