Кэлэр нэдиэлэттэн, сэтинньи 18 күнүттэн, куорат оптуобустара саҥардыллыбыт схеманан айанныахтара
Сэтинньи 18 күнүттэн куорат уопсастыбаннай тырааныспарын ситимин уларытыы бырайыагын маҥнайгы түһүмэҕин быһыытынан бастакынан 2, 4, 5, 6, 7, 14, 16, 19, 35 №№-дээх оптуобустар саҥардыллыбыт схеманан айаннаан саҕалыахтара.
Быйылгыттан маны кытта икки урут суох, саҥа маршрут киирдэ – 11 №-дээх уонна 12 №-дээх. Санатар буоллахха, 11 №-дээх маршрут алтынньы 14 күнүттэн үлэтин саҕалаабыта.
Тиэйээччилэргэ ыытыллыбыт аһаҕас муниципальнай куонкурус түмүгүн, саҥардыллыбыт схемалары нэһилиэнньэ дэбигис ылынарын туһугар турар ирдэбиллэр о.д.а. туһунан баһылык Евгений Григорьев сэтинньи 14 күнүгэр бэйэтин телеграм-ханаалыгар бу курдук иһитиннэрэр:
– Билэргит курдук, сэтинньи 18 күнүттэн куорат сорох маршрутнай оптуобустарын схематыгар уларыйыы киирээри турар.
Ол курдук, пассажирдары тиэйиигэ биллэриллибит аһаҕас муниципальнай күрэх түмүгэ таҕыста. Быйыл куорат уопсастыбаннай тырааныспарын маршруттарын барытын биэс лотка араардыбыт, биирдии лот үстүү маршруттан турар.
Бүгүн сарсыарда маршруттар биригэдьиирдэрин кытта көрсөн, кэккэ боппуруостары дьүүллэстибит. Саамай сүрүнэ – сэтинньи 18 күнүттэн массыыналар саҥардыллыбыт схеманан үлэлииргэ бэлэмнэрин быһаарыстыбыт. Саҥардыллыбыт схеманан айаны-сырыыны куорат олохтоохторо түргэнник ылыналларын туһуттан графигы тутуһуу, пассажирдарга ытыктабыллаах сыһыан курдук түгэннэри эмиэ тумнубатыбыт. «Умный транспорт» сыһыарыы уонна Диспетчерскэй сулууспа нэһилиэнньэттэн киирэр ыйытыыларынан, үҥсүүлэринэн эмиэ сыысхала суох үлэлииллэрэ ирдэнэр.
2025 сылга куорат уопсастыбаннай тырааныспарын ситимин саҥардыы бырайыага салҕанар, онон тиэхиньикэни саҥардыы боппуруоһун дьүүллэстибит. Чааһынай тиэйээччилэр биир сүрүн кыһалҕалара – гараас, гаас уматык, өрөмүөн о.д.а. Каадыр боппуруоһа билигин даҕаны сытыытык турар. Анал байыаннай дьайыыттан кэлбиттэри кытта кэпсэтиилэри ыытарга сүбэлэстибит.
Бу күннэргэ оптуобустар сырыыларын саҥа схемаларын бэчээттээн, оптуобустарга, тохтобулларга тарҕатыахтара. Үөрэх управлениетыгар кылаас салайааччылара хас биирдии төрөппүккэ уонна үөрэнээччигэ саҥардыллыбыт схемалары тиэрдэллэрин ситиһэргэ сорудахтаатыбыт.
Ытыктабыллаах киин куорат олохтоохторо уонна ыалдьыттар!
Оптуобустар саҥардыллыбыт схемаларын кытта эрдэттэн сиһилии билсии үлэ-сырыы, күннээҕи түбүк кыһалҕата суох оҥоһулларыгар тирэх буоларын умнумаҥ:
Икки саҥа маршрут:
Дьокуускай куораттааҕы Суол-тырааныспар сулууспатын сиһилии быһаарыытын бу ссылканан билсиҥ: https://yakutskcity.ru/press-tsentr/obnovlennaya-skhema-dvizheniya-gorodskikh-avtobusnykh-marshrutov-nachnet-deystvovat-18-noyabrya/
Сонуннар
Ордук ааҕаллар
