Дьон сөбүлээн түмсэр сирдэринэн библиотекалар буоллулар

Кэлиҥҥи кэмҥэ саамай дьон-сэргэ сөбүлээн сылдьар, түмсэр сирдэринэн библиотекалар буоллулар. Үлэһиттэр хас биирдии киһини үөрэ көрсөн, араас тэрээһиннэригэр ыҥыран үөрдэллэр, кэм ханна эрэ туһалаах курдук сананаҕын. Норуокка этэллэринэн, “Ханна үөрэ көрсөллөр да, онно киһи ордук тардыһар”.

Дьокуускай куорат Вера Петровна Осипова салайааччылаах Мархатааҕы “Встреча” библиотекатын кэлэктиибэ үгүс дьону-сэргэни үөрэ көрсөн, бэйэлэрин тула түмэллэрин уонна киэҥ хабааннаах олус интэриэһинэй тэрээһиннэри тиһигин быспакка ыыталларын бэлиэтиэхпин баҕарабын. Маны таһынан, Марха уруккутун үөрэтэр, бэрт кэрэхсэнэр былыргы хаартыскалары, тэриллэри, кинигэлэри быыстапка оҥорон тиэмэлэринэн туруоран, дьоҥҥо кэпсээн киэҥник сырдаталлар. Хас биирдии быыстапкаҕа турар былыргыны кэрэһэлиир саһарбыт хаартыскалары, докумуоннары Вера Петровна уу сахалыы иэйиилээхтик кэпсиирин саастаах дьон олус астына, дуоһуйа истэбит. Бэйэтин үлэтин үчүгэйдик билэр, араас саастаах дьон, араас көрүүлээх, билиилээх киһи сылдьарын табан кэпсэтэн, быһааран, наадыйар кинигэлэрин булан биэрэн, оҕолорго сүбэлээн, быһааран, күннээҕи үлэтэ көдьүүстээхтик түмүктэнэр. Салайааччы киһи күн ахсын саҥаттан саҥаны толкуйдаан, үлэһиттэрин дьарыктарын сөптөөхтүк аттаран, үлэтин туһугар элбэх сыратын биэрэрин түмүгэр үлэ таһаарыыта үрдүүрэ чахчы. Ону сэргэ хас биирдии кинигэ ис хоһоонун дьоҥҥо тиэрдии, картотекаларын толоруу түбүгэ аата-ахсаана суоҕа биллэр.

Саха сиринээҕи "Дууһабытынан эдэрбит" киин "үрүҥ көмүс" волонтердарын оҥоһуктара "Встреча" библиотекаҕа алтынньы 26 күнүттэн сэтинньи 15 күнүгэр диэри быыстапкаҕа турдулар. Манна өрөспүүбүлүкэ улуустарыттан "үрүҥ көмүс" волонтердар илиинэн оҥорбут араас үлэлэлэрэ сэргэхтик наарданан туруоруллан, олохтоохтор сэҥээриилэрин ылла.  Валентина Васильевна Егорова (Ньурба, Маар), Александра Фомична Оконешникова (Чурапчы, Мугудай), Елизавета Петровна Егорова (Ньурба, Маалыкай), Галина Алексеевна Чукрова (Уус Алдан, Найахы), Анастасия Гаврильевна Мигалкина салайааччылаах «Күндүүнэ» (Уус Алдан, Мүрү),  Надежда Прокопьевна Петрова салайааччылаах «Ситим» (Бүлүү улууһа), Жоржетта Ивановна Текеянова салайааччылаах «Сандаара» (Горнай, Маҕарас) түмсүүлэр «үрүҥ көмүс» волонтердарын олбохторо быыстапканы ситэрэн биэрдилэр. Мантан салгыы Елизавета Юрьевна Большакова салайааччылаах "Эркээни" түмсүү «үрүҥ көмүс” волонтердарын оҕуруонан дьэрэкээн хартыыналара быыстапкаҕа уурулуннулар, онтон бииргэ үлэлэһэр өрөспүүбүлүкэтээҕи коррекционнай оскуола тулаайах уонна көрүүтэ суох хаалбыт оҕолорун оҥоһуктарын Анна Валерьевна Филиппова туруоран көрдөрөр былааннаахтар.
Инникитин бу библиотекабыт үлэтэ сайдан, кэҥээн иһэригэр баҕа санаабын тиэрдэбин.