Киинэ павильона 2028 сылга үлэҕэ киирэр буолбут

Дьокуускай куорат маастар-былаанынан куорат 68-с кыбаарталыгар тутуллуохтаах элбэх функциялаах киинэ павильонун бары даҕаны тэһийбэккэ күүтэбит.
Сэтинньи 12-13 күннэригэр буолан ааспыт III-с «Цифровой алмаз» федеральнай форум «Якутская киноиндустрия: новый этап роста и
масштабирования» сессиятыгар Саха сирин сайыннарыы корпорациятын эксперэ Николай Саввин киинэ павильонун бырайыагын эһиилгиттэн күүскэ ылсан, тутууну 2028 сылга түмүктүүрү былаанныылларын иһитиннэрдэ. 
Санатар буоллахха, киинэ устар, таҥар, тыаһын-ууһун суруйар, талбыт локацияны, интерьеры оҥорор кыаҕы биэрэр 360 кыраадыс эргийэр XR-экран курдук кыахтаах оборудованиенан толору хааччыллыылааах павильон киинэни дьыл кэмиттэн тутулуга суох устар кыаҕы биэриэхтээх. 
Саха киинэтигэр анааллаах сессия кыттыылаахтара ити курдук саха киинэтин хаачыстыбатын үрдэтии, прокат географиятын кэҥэтии, инвестициялары киллэрии, инфраструктураны сайыннарыы боппуруостарын дьүүллэстилэр. 
Ил Дархан уонна Бырабыыталыстыба пресс-сулууспата иһитиннэрэринэн, быйыл «Цифровой Алмаз» форум аныгы технологиялары хото киллэриигэ, оҥорууга туһуланна. Форумҥа Арассыыйа регионнарыттан уонна тас дойдулартан 3600 киһи кыттыыны ылбыт.