Култуура эйгэтин каадырынан хааччыйыы хайдаҕый?

Култуура уонна духуобунас министиэристибэтигэр иһитиннэрэллэринэн, 1030 устудьуон култуура тэрилтэлэригэр үлэлииргэ бэлэмнэнэр.

Ол курдук, култуура эйгэтигэр тус сыаллаах үөрэхтээһин В.А. Босиков аатынан Музыка үрдүкү оскуолатыгар, Аксения уонна Наталья Посельскаялар ааттарынан Балет оскуолатыгар, Марк Жирков аатынан Музыка колледжыгар, Петр Романов аатынан художественнай училищеҕа уонна Аграфена Макарова аатынан култуура колледжыгар култуура эйгэтигэр үлэлиэн баҕалаах каадырдарга тус сыаллаах үөрэхтээһин ыытыллар. Миниистири солбуйааччы Марина Силина бэлиэтииринэн, идэлээх исписэлиистэр уонна үрдүк квалификациялаах каадырдар үлэ миэстэтинэн хааччыллыыларыгар, миэстэлэргэ каадыр тиийбэтин быһаарыыга култуура уонна духуобунас министиэристибэтэ сүҥкэн болҕомтону уурар.
Маны сэргэ «Култуура» нацбырайыагынан өрөспүүбүлкэ таһымнаах анал бырайыактар үлэлииллэр. Ол иһигэр 2019-2020 сылларга ыытыллыбыт «Щепкинцы» уонна «Щукинцы» бырайыагынан дойду Үрдүкү театральнай училищеларыгар туттарсан киирбит оҕолор номнуо өрөспүүбүлүкэ тыйаатырдарыгар үлэлии сылдьаллар. 
Санатар буоллахха, Саха сирин үрдүнэн 487 култуурунай-сырдатар тэрилтэ баар. Манна 10 тыһыынча кэриҥэ идэлээх исписэлиис үлэлиир. Кэлиҥҥи сылларга өрөспүүбүлүкэ үрдүнэн 50-тан тахса култуура тэрилттэ үлэҕэ киирдэ, диэн иһитиннэрэр Ил Дархан уонна Бырабыыталыстыба пресс-сулууспата. 
Бэлиэтээн эттэххэ, дойду баһылыга Владимир Путин сорудаҕынан 2025 сыл тохсунньу 1 күнүттэн «Земскэй култуура үлэһитэ» бырагыраама үлэлээри турар. Бу бырайыагынан тыа сиригэр, аҕыйах нэһилиэнньэлээх куораттарга үлэлии тиийбит култуура исписэлиистэригэр 1 мөлүйүөн солкуобай кээмэйдээх биир кэмнээх төлөбүр оҥоһуллуоҕа. Уһук Илиҥҥэ бу суума икки бүк үрдүк – 2 мөлүйүөҥҥэ тэҥнэһэр. 
Бу иннинэ СӨ култуура министиэристибэтигэр иһитиннэрбиттэринэн, «Земскэй култуура үлэһитэ» бырагырааманан 2030 сылга диэри Саха сиригэр 200 исписэлиис ирдэнэр – искусство оскуолаларыгар, кулууптарга, библиотекаларга, музейдарга о.д.а.
«Земскэй култуура үлэһитэ» бырайыак сүрүн сыала – тыа сирин идэлээх исписэлиистэринэн хааччыйыы. Оттон бырагыраама кыттыылаахтарынан саҥа үөрэхтэрин бүтэрбит эдэр исписэлиистэри сэргэ уопуттаах каадырдар эмиэ буолуохтарын сөп. Маныаха сүрүн ирдэбилинэн анал орто эбэтэр үрдүк үөрэхтээх буолаллара буолар, диэн иһитиннэрэн турар Ил Дархан уонна Бырабыыталыстыба пресс-сулууспата.