Гааһы киллэртэриигэ бэриллэр субсидия кээмэйэ өссө улаатта

Нэһилиэнньэ кэккэ араҥатыгар дьиэҕэ гааһы киллэртэриигэ бэриллэр аадырыстаах көмө кээмэйэ 150 тыһ. солкуобайтан 202 тыһ. солкуобайга диэри улаатта.

Маннык дьаһалы Ил Дархан Айсен Николаев өрөспүүбүлүкэ бырабыыталыстыбагар биэрдэ уонна булгуччулаахтык толорорго ирдээтэ. «Социальнай гаастааһын бырагырааматын ситиһиилээхтик олоххо киллэрии уонунан тыһыынча киһи олоҕун уйгутун тупсарар», – диэн бэлиэтиир Айсен Николаев.
Үлэ уонна социальнай сайдыы министиэристибэтин чахчытынан, ааспыт 2023 сылга маннык көмөнөн 1464 киһи уопсайа 212 мөл. солк. суумаҕа туһаммыт, 2024 сылга – 1214 киһи 161 мөл. солк., диэн иһитиннэрэр Ил Дархан уонна Бырабыыталыстыба пресс-сулууспата.
Санатар буоллахха, дьиэҕэ гаас киллэртэриигэ субсидия ылар араҥанан кыаммат ыаллар, Аҕа дойду Улуу сэриитин кыттыылаахтара, тыыл бэтэрээннэрэ, анал байыаннай дьайыы бэтэрээннэрэ уонна кинилэр дьиэ кэргэттэрэ о.д.а. буолаллар.
Дьиэҕэ гааһы киллэртэриигэ аадырыстаах көмө кээмэйэ 2022 сыллаахха 100 тыһыынча солкуобайтан 150 тыһыынча солкуобайга диэри улааппыта. Оттон олорор дьиэлэри гаастааһыҥҥа материальнай көмө 2010 сылтан оҥоһуллар. Ол курдук, 2010–2021 сылларга 813 мөл. солк. кээмэйдээх аадырыстаах көмөнөн 9 тыһыынча кэриҥэ дьиэ кэргэн туһаммыта биллэр. 
СӨ Бырабыыталыстыбатын 2010 сыл кулун тутар 19 күнүнээҕи 104 №-дээх «Кыаммат уонна биирдиилээн гражданнар категорияларын олорор дьиэлэрин гаастааһыҥҥа биир кэмнээх аадырыстаах материальнай көмөнү оҥоруу балаһыанньатын бигэргэтии туһунан» уурааҕын чэрчитинэн 2023 сылга Дьокуускай куоракка 399 ыалга материальнай көмө оҥоһулунна диэн суруйан турабыт. 
Оттон олорор дьиэни гаастааһыҥҥа материальнай көмөҕө наадыйааччылар сайабылыанньаларын олорор сирдэринэн управаларга туттаралларын санатабыт.