Тупсарыы үлэтэ маастар-былааҥҥа олоҕурар

Дьокуускай куорат баһылыга Евгений Григорьев сэтинньи 25 күнүгэр “Россия-24” ханаал быһа эпииригэр иһитиннэрбитинэн, куораты тупсарыыга ыытыллар үлэ сүрүннээн В.В. Путин бигэргэппит Дьокуускай сайдыытын маастар-былаанын олоххо киллэрии чэрчитинэн ыытыллар. 
– Быйыл алтынньыга саҥардыллыбыт, тупсаҕайдык өрөмүөннэммит Ленин болуоссата, Ийэ скверэ, Р.М. Дмитриев кытыла арылыннылар. Бу барыта дойду бэрэсидьиэнэ В.В. Путин бигэргэппит Дьокуускай сайдыытын маастар-былаанын олоххо киириитэ. Ленин болуоссата олоччу саҥардылынна, кылгас кэм иһигэр сүҥкэн өрөмүөн үлэтэ баран, алтынньы 13 күнүгэр былааннаммыт барыта олоххо киирдэ.
Маны тэҥэ Р.М. Дмитриев аатынан кытыл тупсарылынна, ону кытта куорат сөтүөлүүр сирин территорията кытта хабылынна – эһиил сайын куорат олохтоохторо ыытыллыбыт үлэни өссө төгүл үчүгэйдик көрөн, сөбүлүөхтэрэ дии саныыбын. Сайсары кытылын тупсарыы үлэтэ билигин 90 бырыһыан бэлэм. 
Бу үс ааттаммыт бырайык маастар-былааҥҥа киирбиттэрэ, олохтоохтор саамай сөбүлээн сылдьар уопсастыбаннай туоналарын быһыытынан талыллыбыттара,- диэтэ Евгений Григорьев “Россия-24” ханаал быһа эпииригэр.

Хаартыска: sportyakutia.ru