Төрүт култуураны тарҕатааччыларга истипиэндьийэ туттарылынна

Бүгүн, Саха Өрөспүүбүлүкэтигэр Олоҥхо күнүгэр, 25 олоҥхоһут, оһуохайдьыт, тимир ууһа уонна норуот маастара Ил Дархан истипиэндьийэтин хаһаайына буолла. 
Ил Дархан Айсен Николаев бэлиэтээбитинэн, 2022 сылтан маннык истипиэндьийэ 81 киһиэхэ туттарылынна. 
Быйылгы истипиэндьийэ хаһаайыннарын ааттарыттан харда тыл эппит Арассыыйа үөрэҕириитин туйгуна, СӨ үтүөлээх учуутала Александра Артемьева бэлиэтээбитинэн, маннык истипиэндьийэни анааһын – норуот култууратын уонна духуобунай сайдыытын сайыннарыыга салгыы үлэлииргэ улахан өйөбүл. «Биһиги ийэлэрбититтэн, аҕаларбытыттан, эбэлэрбититтэн, эһэлэрбититтэн ылбыт билиибитин үүнэр көлүөнэҕэ тиэрдиэхтээхпит», – диир оһуохайдьыт Александра Артемьева.     
Айсен Николаев бэлиэтээбитинэн, норуот үгэстэрин, култууратын сөргүтүүгэ, сайыннарыыга Саха Өрөспүүбүлүкэтигэр элбэх үлэ ыытыллар. Икки сыллааҕыта оһуохайбыт Арассыыйа норуоттарын барҕа баайынан билиниллибитэ, быйыл Саха сирин олохтоохторо аан бастаан Оһуохай күнүн бэлиэтээтилэр. Сыл аайы өрөспүүбүлүкэҕэ Олоҥхо күнэ бэлиэтэнэр. Быйылгы Олоҥхо ыһыаҕа Амма улууһугар буолан ааста, эһиил – Нерюнгрига. Өрөспүүбүлүкэ уопсастыбаннаһын көҕүлээһининэн Олоҥхо дьиэлэрин тиһигэ тэрилиннэ, манна уон оройуон култуураҕа тэрилтэлэрэ киирдилэр. Бу хайысхаҕа сыл аайы бүддьүөттэн 50 мөл. солк. көрүллэр. 
Эһиил Дьокуускайга Арктикатааҕы эпос уонна искусство киинэ тутуллан үлэҕэ киириэҕэ. 
Санатар буоллахха, норуот төрүт култууратын тарҕатааччыларга –
олоҥхоһуттарга, оһуохай тылын этээччилэргэ, тимир уустарыгар истипиэндьийэ Ил Дархан ыйааҕынан 2022 сылга олохтоммута, норуот маастардарыгар – 2023 сылтан. Истипиэндьийэ хаһаайыттара куонкуруһунан быһаарыллаллар, кээмэйэ 30 тыһыынча солкуобай, диэн иһитиннэрэр Ил Дархан уонна Бырабыыталыстыба пресс-сулууспата.

Хаартыска: Андрей Сорокин, СИА