Тэтиҥ хатырыгын ылан иһэбит

Ыам ыйын бүтүүтэ тэтиҥ хатырыгын сулуйан ылабыт. Ылыах иннинэ тэтиҥҥиттэн көрдөһөҕүн, наадаҕа туттаары, эмтэнээри, туһанаары диэн уонна үрүҥ аһынан, алаадьынан айах тутаҕын.
Бастаан хатараҕын, кыптыыйынан кырыйан аччатыахха сөп. Икки остолобуой ньуосканы биир ыстакаан уу кутан баран хаппахтаан бытаан уокка оргутаҕын, 5-7 мүнүүтэ. Онтон сиидэлиигин, иккиһин оргутан туттуохха эмиэ сөп. Ону 10 мүнүүтэ уһатан оргутан биэрэҕин. Бытааннык сойорун инниттэн, суорҕанынан суулаан, киэһэ оргутан баран сарсыардааҥҥа диэри туруорабыт. Сарсыарда аайы ыстакаан үс гыммыт биирин иһэҕин. Хааны убатар, холестерины суурайар, хаан эргииригэр, сүрэххэ, быарга, дабылыанньаҕа туһалыыр.
Киэһэ-сарсыарда уон хонук иһэҕин, онтон биир ый тохтобул. 
Тэлгэтэн күлүк сиргэ куурдаҕын, онтон кыптыыйынан кырыйаҕын, мин анал х\б таҥастан мөһөөччүккэ хаһаанабын.