Төбөтүн быһа баттаа — уккун хойуннар

Үгүс сибэккини төбөтүн быһа туттахха, уга хойдор, ол аата сибэккитэ элбиир. Ол эрээри элбэх оҕуруотчут циния сибэкки төбөтүн быһа тутартан толлор, быһата, петуния, лобелия курдук ыл да быһа баттыыр үөрүйэҕэ суох. Уопуттаах оҕуруотчуттар маныаха куттанар төрүөт суох диэн сүбэлииллэр. Сырдыга тиийбэккэ аһара уһаабыт циния угун бастакы дьиҥнээх сэбирдэхтэригэр диэри буорга батары олортоххо, эбии силис үүннэринэр, оттон төбөтүн оройун быһа туттахха, хоннохтор үүнэннэр, хойуу уктаах буолар дииллэр. Сорох оҕуруотчуттар уһаабыт цинияны ортотунан быһа баттаан, үөһээ өттүн силис тартаран элбэтэр албастаахтар эбит. Ол эрээри аныгы гибрид сиэмэлэр уһаатахтарына даҕаны хоннохтон умнас үүннэрэр уратылаахтар. 
Манна даҕатан эттэххэ, помидор арассаадатын эмиэ ортотунан быһа баттаан, үөһээ өттүн силис тартаран, үүнээйи ахсаанын элбэтиэххэ сөп. Помидор уга көрүөх бэтэрээ өттүгэр силис тардарын оҕуруотчут эрэ барыта билэр.