Сулустарга талаһан

Дьокуускайга «Путь к звездам. 100-летие ЯАССР» диэн ыччат айымньытын бэстибээлэ буолан ааста.

Тэрийээччилэр – «Сулус Арт» Автономнай кэмиэрсийэтэ суох тэрилтэ (дириэктэр С.Т. Иванова) уонна Ю.А. Гагарин аатынан Култуура уонна аныгы искусство киинэ (дириэктэр Е.П. Винокурова). Бэстибээл Саха Өрөспүүбүлүкэтин Баһылыгын Саха сиригэр гражданскай уопсастыбаны сайыннарыыга гранын үбүнэн ыытылынна, салайааччы – Е.С. Пеньков.

Быйыл иккис төгүлүн буолан ааспыт «Путь к звездам» бэстибээлгэ өрөспүүбүлүкэ 11 улууһуттан 14-тэн 35-гэр диэри саастаах талааннаах ыччат кытынна. Кинилэртэн гала-кэнсиэргэ 200 финалист киирдэ. Бэстибээл Арассыыйа үрдүнэн ыытыллар Норуот искусствотын уонна материальнайа суох култуурунай нэһилиэстибэтин сылыгар, Саха Өрөспүүбүлүкэтигэр биллэриллибит Ийэ сылыгар уонна Саха автономнай сэбиэскэй социалистическай өрөспүүбүлүкэтэ төрүттэммитэ 100 сылыгар ананна.

Бэстибээл аныгы искусство уһулуччу суолталаах хайысхаларынан ыытылынна: «Вокальнай айымньы», «Ойуулуур-дьүһүннүүр искусство», «Хореография», «Видео-айымньы». Маны сэргэ Саха сирин култууратыгар уонна искусствотыгар анаммыт маастар-кылаастар уонна лекциялар буолан аастылар. Дьүүллүүр сүбэ састаабыгар живописец-худуоһунньук М.П. Аргунова, Арассыыйа худуоһунньуктарын идэлээх сойуустарын чилиэнэ В.П. Божедонова, график- худуоһунньук В.Г. Камшилин, Саха Өрөспүүбүлүкэтин үтүөлээх артыыһа И.А. Егорова, Саха Өрөспүүбүлүкэтин култууратын туйгуна Е.М. Кузьменко, «Квик-степ» спортивнай үҥкүү кулуубун салайааччыта Д.В. Никитин, вокалист-артыыстар А.А. Сёкова уонна Т.С. Алексеева, мелодист-ааптар И.П. Донская, киинэ продюсера Е.В. Ушакова, киинэ сценариһа уонна продюсера А.А. Коннов, телевидение уонна киинэ оператора В.И. Протодьяконов үлэлээтилэр.

Түмүккэ «Видео-айымньы» хайысхатыгар Николай Петухов, Дьокуускай куорат 31-с №-дээх орто оскуолата (салайааччы Д.И. Попов) кыайыылаах үрдүк аатын ылла; «Ойуулуур-дьүһүннүүр искусство» хайысхатыгар – Кирилл Шамаев, Дьокуускай куорат, С.И. Климаков аатынан 24-с №-дээх орто оскуола (салайааччы А.П. Большакова); «Вокальнай айымньы» – «Сырдык дорҕоон» трио, Дьокуускай куораттааҕы Ю.А. Гагарин аатынан Култуура уонна аныгы искусство киинэ (салайааччы С.В. Бочкарева); «Хореография» – Салжид Оргилбаяр Нямжав, АГИКИ, Дьокуускай куорат (салайааччы З.Н. Попова).

Гала-кэнсиэр кэнниттэн бэстибээл тэрийээччилэрэ уонна финалистара РФ Байыаннай-салгын күүстэрэ төрүттэммиттэрэ 110 сылыгар аналлаах «Стартуем к звездам!» Бүтүн Арассыыйатааҕы оҕо айымньытын аһаҕас куонкуруһун кыттыылаахтарыгар видео-эҕэрдэни уһуллулар. Аһаҕас куонкурус көҕүлээччитинэн Ю.А. Гагарин аатынан Култуура уонна аныгы искусство киинин партнера  Москва куораттааҕы Байыаннай-салгын күүстэрин киин офицерскай кулууба буолар.

Мантан инньэ бэстибээл Ю.А. Гагарин аатынан Култуура уонна аныгы искусство киинин баазатыгар, култуура уонна искусство эйгэтиттэн партнердары түмэн, сылын аайы ыытыллыаҕа. Тиэмэтэ улахан суолталаах уонна өйдөбүнньүк дааталарга олоҕуран оҥоһуллар.

Тэрээһин партнердара: Арктическай судаарыстыбаннай култуура уонна искусство института, Өрөспүүбүлүкэтээҕи норуот айымньытын уонна СӨ социальнай-култуурунай технологияларын дьиэтэ, Олохтоох дьаһалта Уопсастыбаннай сибээстэргэ уонна ыччат бэлиитикэтигэр управлениета.