21.12.2020 | 14:58

Станислав Федоров: “Кыһын дьарыктаах киһиэхэ сылаас”

Станислав Федоров: “Кыһын дьарыктаах киһиэхэ сылаас”
Ааптар: Киин Куорат

Станислав Федоровы @kuolauolastas ааҕааччыларбыт “Сэргэлээххэ”, “Сүлүһүннээх таптал. Эргиллии”, “Олох диэн олох” сериалларынан билэллэр. Сатаабата суох диэн, бука, кини курдук дьону ааттыахха сөп.  Мэлдьи дьарыктаах, эргиччи дьоҕурдаах ыалдьыппытын кытта билсиэҕиҥ.

“Сэргэлээххэ” сериал – киинэҕэ бастакы холонуум

–Станислав, баһаалыста, бэйэҥ тускунан ааҕааччыларга кэпсээ. Хантан хааннааххыный, кимтэн кииннээххиний? Ханна үөрэммиккиний? Билигин ханна үлэлиигиний?

–Бэйэм Сунтаартан төрүттээхпин, бииргэ төрөөбүт түөрт уолбут, мин улаханнарабын. СГУ филологическай факультетыгар, нуучча тылын уонна литературатын учууталын идэтигэр үөрэммитим. Билигин риэлторынан үлэлии сылдьабын.

–Киинэҕэ хаһааҥҥыттан уһуллаҕыный? Бастакы холонууҥ? Ханнык оруолга ордук табыллан оонньуугунуй?

–Дьиҥэр, мин туох да артыыс үөрэҕим суох. Устудьуоннуу сылдьан, арай биир  үтүө күн бииргэ үөрэнэр оҕолорбун кытта кастинг буолар диэн биллэрии көрбүппүт. Онно көр-күлүү курдук тиийбиппит. Соһуйуохпут иһин, “Сэргэлээххэ” сериалга уһуллар буолан хаалбыппыт. Мин Афик оруолун толорбутум. Ити бастакы холонуум. Онтон былырыын “Саха” НКИХ “Сүлүһүннээх таптал. Эргиллии” сериалга оонньообутум. Быйыл “Олох диэн олох” сериалга Евгений буолбутум.

Хатастааҕы норуодунай театрга артыыстыыбын. Аҕыйах сыллааҕыта “Күтүөт” диэн киинэ уһуллубута, ютубка баар (Хатаска сыл аайы “Көмүс кынат-2020” бириэмийэ туттарыллар. Быйыл Станислав “Бастыҥ артыыс” анал аат хаһаайына буолбута. – Ааптар).   

Ханнык баҕарар оруолу толоро сатыыбын, төһө кыалларынан. Киинэ олохпор биир сүрүн миэстэҕэ турар, омуктуу, сахалыы киинэлэри кэтээн, сөбүлээн көрөбүн, уопсайынан, бу эйгэҕэ сыһыаннааҕы барытын сэргиибин.

–Бу күннэргэ киэһэ аайы “Саха” көрдөрөр-иһитиннэрэр хампаанньаҕа “Олох диэн олох” сериалы күүтэбит. Сорохтор онон эрэ олороллор. Эн дьоруойуҥ хайдах киһиний? Дьиҥ олоххо маннык Евгенийдэр бааллар дуо? Көрөөччү хайдах ылынна?

–Киинэ аатыгар да баар, кырдьык, олох диэн олох. Евгений курдук дьон баар бөҕө буоллахтара. Кинини куһаҕан диир кыаҕым суох, чугас дьонун сүтэрэн, барытын бэйэтэ ситиспит киһи. Ол эрээри, мин эбитим буоллар, дьиҥ олоххо итинник иэстэһэ сатыам суоҕа этэ. Көрөөччү араастык ылынар, ким эрэ сөпсөһөр, ким эрэ ылыммат. Хас киһи баарый, оччо санаа баар буоллаҕа дии.

Интернеттэн көрөн, дьон сүбэтинэн

–Инстаграмҥа аккауҥҥун арыйа баттаатахха, сатаабатыҥ диэн суох быһыылаах. Уһанар, уран тарбахтаах диэн көрбүтүм. Тугу оҥороҕун?

–Оннук улахан уус буолбатахпын эрээри, син ону-маны оҥоро сатыыбын. Аҕам уус киһи, онтон бэриллибитэ буолуо дии саныыбын. Сайыҥҥы өттүгэр декоративнай кирпииччэ оҥорон атыылыыбын, иллэҥ кэммэр эбии дьарык курдук. Дьиэм истиэнэтин онон киэргэппитим. Дьарыктаммытым үс сыл буолла. Интэриниэккэ көрөммүн, маны оҥоруохха сөп эбит диэн, формаларын сакаастаан оҥорон саҕалаабытым.

–Дьиэни тупсарар, өрөмүөннүүр дьарыгыҥ туһунан сиһилии кэпсээ.

Дьиэни өрөмүөннүүр сакаас ыла иликпин, эппитим курдук, маһы хаамтарар уус буолбатахпын (күлэр). Бэйэм дьиэм иһигэр ону-маны оҥоро сатыыбын, эмиэ интэриниэттэн көрөн, сороҕун дьон сүбэтинэн.

Маастар-кылааска сылдьан үөрэммитим

–Аны асчыт бэрдэ эбиккин. Туортары сакааска оҥороҕун дуо? Хаһааҥҥыттан астыыгыный?

–Туорт диэ (күлэр). Уопсайынан, оҕо эрдэхпиттэн ас астыырбын олус сөбүлүүбүн. Анал биэриилэри сэргээн көрөбүн. Туорт астааһыным маастар-кылаастан саҕаламмыта. Икки маастар кылааска сылдьыбытым. Тиийбитим, барыта кыргыттар, эр киһи мин эрэ.  Эр киһи туорт астыыр эбит дуу диэн сөҕөллөр этэ. Онтон доҕотторбор, аймахтарбар астаан, сыыйа сакаас ылар буолбутум. Сүрүннээн мүөттээх уонна кыһыл баархат туортары оҥорор этим. Билигин тохтоон турабын, баҕар, хаһан эмит бу дьарыкпын салҕыам.

Иллэҥ кэм

– Көрдөөх, көрүдьүөс видеолары уһулаҕын. Арааһа, бэйэҥ дьээбэлээххин быһыылаах?

– Бэһиэлэйбин. Доҕотторбун,  аймахтарбын күллэртиирбин, дьээбэлиирбин сөбүлүүбүн. Сороҕор “тохтоо” диэхтэригэр диэри (күлэр).

– Сир астыыгын, бултуугун дуо?

– Айылҕаҕа сылдьарбын, сир астыырбын олус сөбүлүүбүн. Сайын аайы хас да хонукка доҕотторбутун кытта айылҕалыын алтыһа, сынньана барабыт, ордук Амма, Хаҥалас, Нам улуустарыгар. Отоннуубут, сугуннуубут. Холобур, бу күһүөрү сайын Алдаҥҥа сугуннаан кэлбиппит. Булка улахан сыһыаным суох, ол эрээри балыктыыбын. Биирдэ эмит куска сылдьыахпын сөп.

Баҕардахха, космоска көтүөххэ сөп

–Сатабыллаах буоларга ким үөрэппитэй? Айар дьоҕуруҥ кимтэн бэриллибитий?

Эр киһи сатабылларыгар аҕабыттан үөрэммитим, кыра эрдэхпиттэн уһанарын көрөн улааппытым. Айар дьоҕурум ийэм өттүнэн аймахтарбыттан бэриллибит дии саныыбын. Бары ырыаһыттар, мелодистар, култуура үлэтигэр сыһыаннаах дьон.

–Дьиэ кэргэҥҥин билиһиннэр.

Кэргэннээхпин, үс оҕолоохпун, икки кыыс номнуо устудьуоннар. Кырабыт – уол, төрдүс кылааска үөрэнэр.

–Пандемияҕа төһө хаайтардыҥ?

–Улаханнык хаайтарбатым эрээри, атахтааһыннар бааллар бөҕө буоллаҕа. Аан дойду дьонун барытын да таарыйда ини.

–Тугу сатаабаккыный? Хаһан эрэ сололоннохпуна хайаан да ылсыам диэн хаһаана сылдьар дьарыктааххын дуо?

–Дьиҥэр, киһи сатаабата диэн суох, баҕардахха, космоска көтүөххэ сөп дииллэр. Онон тугу эрэ кыайбатахпына, үөрэтэн да ылсыахпын сөп.

  Бу этиилэри салҕаа 1. Олох диэн киһиэхэ биирдэ бэриллэр саамай күндү бэлэх. 2. Дьол диэн оҕо күлүүтэ, чэгиэн-чэбдик сылдьыыта. 3. Дьоллоох киһи  – доруобай киһи. Доруобуйа баар буоллаҕына, барыта баар буолуо. 4. Ким сөбүлүүр дьарыктаах – ол  бэйэтин булбут, дьоллоох киһи. 5. Кыһын... тымныы эрээри, дьарыктаах киһиэхэ сылаас.

Сонуннар

Ордук ааҕаллар

Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.
Юрий Попов: «Барыта улахан үлэттэн тахсар»
Дьон | 25.11.2022 | 16:00
Юрий Попов: «Барыта улахан үлэттэн тахсар»
Дьокуускайга Тупсарыы үс сыла биллэриллэн, бу диэн эттэххэ, киин куоракка, чахчы, үтүмэн үлэ ыытылынна, ону олохтоохтор даҕаны бэйэҕит көрө-истэ сылдьаҕыт.  Быйыл сайын «Уһук Илиҥҥэ 1000 тиэргэн» федеральнай бырайыагынан Дьокуускай куоракка 75 тиэргэн тупсаран оҥоһулунна. Саамай элбэх эбийиэккэ бэдэрээтчитинэн «Основа» ХЭТ үлэлээтэ. Онон бүгүҥҥү нүөмэрбитигэр бу тэрилтэ эдэр салайааччыта Юрий Поповы...