Спортсмен оҕолорбутунан киэн туттабыт!

Уонча күн бука бары “Азия оҕолоро” Оонньууларынан олордубут. Элэс гынан, ньиргийэн ааһа оҕустулар. Өйгө-санааҕа үтүө, чаҕылхай түгэннэр иҥэн хааллылар.

Биһи үрдүк үөрүүбүтүгэр, Сахабыт сирин оҕолоро түһэн биэрбэтилэр. Мөлүйүөнүнэн нэһилиэнньэлээх Азия улахан дойдуларын, Арассыыйа бөдөҥ  регионнарын хамаандаларын кытта эрбии тииһинии тэҥҥэ эрийсэн күрэхтэстилэр. 35 мөл. нэһилиэнньэлээх Узбекистан хамаандата бастаата, 16 мөл. киһилээх Сибиир хамаандата – иккис, 10 мөл. нэһилиэнньэлээх Белорусь үһүс миэстэлэри ыллылар. Онуоха холоотоххо баара суоҕа 1 мөл. нэһилиэнньэлээх Сахабыт сирэ Москва, Урал, Казахстан курдук күүстээх хамаандалары кэннигэр хааллартаан, төрдүс үчүгэй көрдөрүүлэннэ. Бастакы хамаандабыт 24-тэн 18 көрүҥҥэ араас солотуулаах мэтээллэри ылаттаата! Онон спортсмен оҕолорбутунан, спорт куттаах Сахабыт сиринэн киэн туттабыт!

Оонньуулар бастакы күннэригэр маҥнайгы кыһыл көмүс мэтээли тхэквондоҕа (сүрүн тренер Яков Гаврильев) – Виктория Татаринцева, боруонса мэтээллэри Дьокуускай спорт оскуолатыгар эрчиллэр Наталья Лазарева, Максим Габрышев (сүрүн тренер Яков Гаврильев) аҕалбыттара. Самбоҕа Алдан спорт оскуолатыттан Иван Лапушкин – үрүҥ көмүс, Анастасия Шевченко, Дьокуускай куорат единоборство киинин иитиллээччилэрэ Сахаайа Корякина, Дарья Шарапова боруонса мэтээллэри ылбыттара. Күрэхтэһиилэр таблицаларын Саха сирин 1-кы хамаандата – XII-ис, 2-с хамаандабыт XI-ис көрдөрүүлэрдээх саҕалаабыппыт.

Москваҕа олимпийскай эрэл училищетыгар үөрэнэр Чурапчы Хатылытыттан Изот Кривошапкин остуол тенниһигэр (сүрүн тренер Аркадий Иванов), төһө да Москва чиэһин көмүскээтэр, Павел Романовскайдыын иккиэ буолан пааранан киирсиигэ кыһыл көмүс мэтээли аҕалбытыттан үөрэбит.

Н.Н. Тарскай аатынан “Туймаада” стадиоҥҥа чэпчэки атлетикаҕа ыалдьыттарбыт кыахтаахтара, күүскэ бэлэмнэммиттэрэ хара ааныттан биллибитэ. Саха сирин быһыйдарын хамаандатыттан (сүрүн тренер Татьяна Ариносова) үстэ төхтөрүйэн ойууга Тааттаттан Альберт Винокуров 13 м 98 см түстэ уонна кыһыл көмүс мэтээл хаһаайына буолары ситистэ! 400 м мэһэйдээх сүүрүүгэ Владислав Данилов үрүҥ көмүс мэтээллэннэ.

Сахалыы атах оонньуутугар Майа спорт оскуолатын иитиллээччитэ Максим Семенов кылыыга 41 м 40 см, куобахха 33 м 27 см түһүтэлээн, уонна үс көрүҥ түмүгүнэн 114 м 53 см көрдөрүүлээх абсолютнай чөмпүйүөн үрдүк аатын сүктэ, кыһыл көмүс мэтээллэри ылаттаата, Оонньуулар рекортарын олохтоото! Марк Никитин, Арылхан Андреев, Дарья Громова уонна Маргарита Тукмакова үрүҥ көмүс, боруонса мэтээллэри ылаттаатылар (сүрүн тренер Тимофей Слепцов).

“Модун” спорт комплексыгар буолан ааспыт художественнай гимнастика күрэхтэһиитигэр “Азия оҕолорун” историятыгар оҕолорбут аан бастакы ситиһиилэннилэр (тренер Виолетта Никифорова). Бөлөҕүнэн күрэхтэһиигэ кыргыттарбыт обруч көрүҥэр элбэх баалы ыланнар, кыһыл көмүс мэтээллэри кэттилэр. Булаваҕа боруонса мэтээллэри ылаттаатылар.

“Триумф” спорт комплексыгар Кыргызстан алыш тустуутун көрүҥэр  Дьокуускайтан Данил Пинигин, Александра Филиппова, Нерюнгри Иенгратыттан Милена Гаврилова үрүҥ көмүс мэтээллэри ылаттаатылар. Анастасия Филиппова финалга Кыргызстан кыыһын хотон, бу көрүҥҥэ хамаандатыгар соҕотох кыһыл көмүһү аҕалла (сүрүн тренер Михаил Явловскай).

“Эллэй Боотур” Муус дыбарыаһыгар Узбекистан хамаандата кураш диэн бэйэтин национальнай тустуутугар күннээтэ. Биһиги оҕолорбут түөрт мэтээллэннилэр: Карина Сикалева – кыһыл көмүс, Евгения Чесебиева, Георгий Чивадзе – үрүҥ көмүс, Вероника Нестерева – боруонса (сүрүн тренер Шагдар Гансух).

Оҕо айар дьоҕурун дыбарыаһыгар Альберт Постников Го остуол оонньуутугар үһүс миэстэлэннэ (тренер Дмитрий Корнев).

“Дохсун” спорт комплексыгар дзюдоҕа икки боруонса мэтээли 52 кг Лейла Неупокоева уонна Евгения Чезебиева аҕаллылар (сүрүн тренер Илья Громов).

Мас тардыһыытыгар 13 хамаандаттан Саха сирин спортсменнара 50 кг Тимир Луковцев, 60 кг Александр Захаров, 80 кг Роман Тарабукин, 80 кг үөһэ Харысхан Габышев түөрт кыһыл көмүс мэтээли ыллылар (сүрүн тренер Дмитрий Саввин).

Саха национальнай гимназиятыгар ыытыллыбыт пневматическай бинтиэпкэнэн ытыыга кыһыл көмүс мэтээллэри Валерия Винокурова уонна Николай Яковлев ылаттааннар (сүрүн тренер Александр Сотников), сахалар ытыыга чахчы дьоҕурдаахпытын итэҕэттилэр.

“Сулус” спорт комплексыгар буолан ааспыт кикбоксинг күрэхтэһиитигэр уолаттарбыт финалга Урал уонна Сибиир спортсменнарын кытта күөн көрүстүлэр. Атахтарынан тэбиилэрдээх, илиинэн охсуулардаах кытаанах киирсиилэригэр кыһыл көмүс мэтээллэри 45 кг Аман Иванов, 51 кг Ярослав Габышев, 54 кг Айаал Поскачин, 63 кг Николай Слепцов ылары ситистилэр. Итини таһынан үс үрүҥ көмүс, икки боруонса мэтээл эбиллэн, үөрүүбүтүн үрдэттилэр (сүрүн тренер Уйусхан Барашков).

“Кыайыы 50 сыла” спорт дыбарыаһыгар мини-футболга “Саха” хамаанда финалга Тюменьтэн “Урал” хамаандатын кытта тэҥ баайыылаах оонньууга баара суоҕа 2:3 баһыйтаран, үрүҥ көмүс мэтээл хаһаайына буолла. Грач Гаспарян – “Бастыҥ кимээччи”, Глеб Зырянов “Бастыҥ бомбардир” анал ааттарынан биһирэннилэр (тренер Олег Марченко).

“Бэргэн” саанан ытыы комплексыгар истиэндэбэй ытыыга  тииҥи харахха табар кыраҕы харахтаах, кытаанах тарбахтаах буойун-снайпердардаахпытынан биллэр Сахабыт сирин оҕолоро эмиэ түһэн биэрбэтилэр. “Трап” уонна “Скит” диэн эрчиллиилэргэ аҕыс мэтээли ыллылар, олор истэригэр Арылхан Петров, Данил Копылов, Айна Кириллина үс кыһыл көмүс, икки үрүҥ көмүс уонна боруонса мэтээллэринэн наҕараадаланнылар. Уоллаах кыыс буккаас паараларыгар “Трапка” Саян Константинов Амилия Седельниковалыын – үрүҥ көмүс, Арылхан Петров Галина Петровалыын – боруонса; “Скиткэ” Данил Копылов Айна Кириллиналыын – үрүҥ көмүс, иккис хамаандаттан Айсен Петров Святослава Владимировалыын боруонса мэтээллэри ылаттаатылар (сүрүн тренер Аркадий Андреев).

“Юность” стадиоҥҥа оҕунан ытыыга буккаас паараҕа Кристина Дрозд Владимир Кимниин финалга Сибиир охчут оҕолорун 6:2 кыайаннар, кыһыл көмүс мэтээллэри ыллылар. Кристина Дрозд, Айыына Васильева уонна Светлана Колодезникова хамаанданан ытыыга боруонса мэтээллэннилэр (сүрүн тренер Надежда Спиридонова).

“Дохсун” спорт комплексыгар боксаҕа Узбекистан уолаттара сэттэлии кыһыл уонна үрүҥ көмүс, икки боруонса мэтээли ылаттаатылар. Уус Алдантан Айсен Неустроев Казахстан боксера Темирхан Жолмаханы кытта киирсиитигэр бүтэһик рауҥҥа көхтөөхтүк үлэлээн хамаандаҕа күүтүүлээх соҕотох кыһыл көмүһү аҕалла! Вилена Моркан – үрүҥ көмүс, Виктор Захаров, Артур Севергин, Данил Софронов боруонса мэтээллэннилэр (сүрүн тренер Василий Лисица).

Көҥүл тустууга (сүрүн тренер Кузьма Сивцев) бастакы хамаандаттан 44 кг Намтан ДЮСШ-3 иитиллээччитэ Арыйаан Винокуров (тренер Н.Г. Яковлев, В.А. Кривошапкин), Эдьигээнтэн Никифор Семенов – кыһыл көмүс, Власий Афанасьев, Саян Федоров – үрүҥ көмүс, Пантелеймон Софронеев боруонса мэтээллэри ылаттаатылар.

Хапсаҕайга 50 кг Сандал Алексеев, 55 кг Олег Кононов – кыһыл көмүс, 62 кг Эйнар Сивцев – үрүҥ көмүс, 50 кг Ильдар Птицын, 62 кг Айхаан Кривошапкин боруонса мэтээллэннилэр.

“Чолбон” бассейҥҥа харбааһыҥҥа 100 м Юлиана Николаева уонна  Елизавета Бакулина үрүҥ көмүс мэтээллэри аҕаллылар.

Оонньуулар үөрүүлээхтик сабыллыыларын үгэнигэр Арассыыйа Бырабыыталыстыбатын бэрэссэдээтэлин солбуйааччы Дмитрий Чернышенко, “Азия оҕолоро” Оонньуулар Норуоттар икки ардыларынааҕы кэмитиэтин бэрэсидьиэнэ Владимир Максимов Саха сирин бары олохтоохторун, ыалдьыттары, спортсмен оҕолору, волонтердары барыларын эҕэрдэлээтилэр. Саха Өрөспүүбүлүкэтин Аҕа Баһылыга Айсен Николаев «Азия оҕолоро» Оонньуулар бырагырааматыгар киллэриллибит спорт 24 көрүҥэр барытыгар кыттаннар, Саха сирин бастакы хамаандатын оҕолоро төрдүс миэстэлэммиттэринэн эҕэрдэтин уонна махталын тиэртэ.

Спортсмен оҕолорбутугар, тренердэргэ уонна төрөппүттэргэ чиэс, хайҕал, албан аат!

Хаартыскалар: «Азия оҕолоро-2024» дневнигиттэн.