Сэтинньи бүтүөр диэри сылаас таҥаһы тутуу салҕанар

Алтынньы 31 күнүгэр буолан ааспыт брифиҥҥэ #МЫВМЕСТЕ Саха сиринээҕи салаатын салайааччыта Айыллаан Винокуров анал байыаннай дьайыы кыттыылаахтарыгар кыһыҥҥы таҥаһы хомуйар «Тёплая осень» аахсыйа сэтинньи ый бүтүөр диэри салҕанарын иһитиннэрбитэ.

«Бастатан туран сылаас таҥаһы, бастакы уочарат наадалаах табаары уонна эми-тому тутабыт», – диэн бэлиэтээтэ Айыллаан Винокуров.
Аахсыйаҕа биирдиилээн, тэрилтэнэн даҕаны кыттыахха сөп. Малы туттарар аадырыс: Дьокуускай к., Бестужев-Марлинскай уул., 5 (ДОСААФ), тиэргэн өттүттэн киириллэр. 
Тутар пуун үлэ күннэригэр сарсыарда 09:00 чаастан киэһэ 19:00 чааска диэри үлэлиир. 
Айыллаан Винокуров маны сэргэ волонтёрдар киирбит сайаапкаларынан күннэтэ анал байыаннай дьайыы кыттыылаахтарын дьиэ кэргэттэригэр аадырыстаах көмөнү оҥороллорун биэлиэтээтэ. Оттон кыһалҕалаахтар «122» нүөмэргэ эбии «6» сыыппараны баттаан эрийэн, сайаапкаларын хаалларыахтарын сөп, диэн иһитиннэрэр Ил Дархан уонна Бырабыыталыстыба пресс-сулууспата.