20-с №-дээх оскуолаҕа «Учуутал үлэтигэр сыыппара эйгэтин туһаныы уонна аттестацияҕа уларыйыылар» диэн семинар-көрсүһүү буолла

Алтынньы 28 күнүгэр Дьокуускай куорат биир бастыҥ, кырдьаҕас 20-с №-дээх орто оскуолатыгар төрөөбүт төрүт тылы үөрэтэр учууталларга аналлаах, үөрэтэр-көрдөрөр, иһитиннэрэр сыаллаах, олус киэҥ ис хоһоонноох, дириҥ толкуйдаах, түмүктээх «Учуутал үлэтигэр сыыппара эйгэтин туһаныы уонна аттестацияҕа уларыйыылар» диэн семинар-көрсүһүү буолла. 

Куйаар ситимин үгүс сыһыарыыларын баһылаабыт Марианна Макаровна Федорова, бэйэтин сыралаах үлэтигэр олоҕуран, оҕо кэрэхсэбилин ылар араас ньыманы көрдөрдө, үөрэттэ. Хас биирдии учуутал туспутугар туһаныахпыт диэн үөрдүбүт, сэргээтибит.

Эдэр, эрчимнээх, саҥалыы көрүүлээх оскуола дириэктэрэ  Андрей Иванович Новоприезжай оскуола историятын, үлэтин хайысхатын, инники былааннарын билиһиннэрдэ.

Семинар-көрсүһүү барылын быһыытынан төрөөбүт тылы, литератураны үөрэтэр учуутал, аттестация ааһар тематын, үөрэх чааһыгар дириэктэри солбуйааччы С.Г. Матвеева кэпсээтэ.

Семинар-көрсүһүү түмүгэр куораттааҕы саха тылын, литературатын, төрүт норуоттар култуураларын үөрэтэр учууталлары салайааччы У.В. Заболоцкая үлэ-үөрэх инники барылын-торумун чуолкайдаан быһаарда.
Бары кэллиэгэлэрбитигэр, төрөөбүт дойдуга бэриниилээх буолууну өрө тутан үлэлиир биир идэлээхтэрбитигэр өссө үрдүк ситиһиини баҕарабыт.