1 №-дээх оскуола тутуута прокуратура хонтуруолугар турар

2021 сыллаахха Дьокуускай куорат прокуратурата ылыммыт дьаһалынан суут быыһаарыытын Ленин пр., 32 аадырыска турар 1941 сыллааҕы саахалланар туруктаах 1 №-дээх оскуола дьиэтигэр үөрэх процеһын ыытар бобуллубута. 
Ол түмүгүнэн 2022 сылтан оскуолаҕа Ленин пр., 50 дьиэтин өрөмүөннээн, атыылаһан биэрбиттэрэ. Ленин пр., 32 аадырыска турбут эргэ эбийиэк көтүрүллүбүтэ. 
Бүгүҥҥү күҥҥэ бу оскуолаҕа анаан 253 миэстэлээх саҥа дьиэ тутулла турар. Эбийиэк 2025 сыл төрдүс кыбаарталыгар үлэҕэ киириэхтээх.
Тутуу хаамыыта прокуратура хонтуруолугар турар, диэн иһитиннэрэр Дьокуускай куорат прокуратурата. 

Санатар буоллахха, Олохтоох дьаһалта пресс-сулууспата иһитиннэрбитинэн, Дьокуускай куорат 1№-дээх оскуолатыгар саҥа дьиэ Уһук Илиҥҥэ Арассыыйа Бэрэсидьиэнин боломуочунайа Юрий Трутнев сорудаҕынан Уһук Илини сайыннарыы министиэристибэтин бырагырааматынан тутуллар. Маны сэргэ тутуу Дьокуускай куорат маастар-былааныгар киирэр. Бэдэрээтчит - Саха Өрөспүүбүлүкэтин судаарыстыбаннай сакаасчытын сулууспата.