17-с кыбаарталтан 51 ыал «Звезднай» түөлбэҕэ кыбартыыра күлүүһүн туттулар

17-с кыбаарталтан 51 ыал «Звезднай» түөлбэҕэ кыбартыыра күлүүһүн туттулар 
Норуокка биллэринэн 17-с кыбаарталга дьэндэйиэхтээх саҥа «Спортивнай» түөлбэҕэ тутуу балаһааккатын таһаарар сыаллаах алта элбэх кыбартыыралаах эргэ дьиэни көтүрүүнэн «Өрөспүүбүлүкэтээҕи ипотека агентствота» Сакаасчыт сулууспата дьарыктанар (РИА). 
Ол курдук, Якутская уул., 59, 61/1, 63, 63/1 уонна Пионерская уул., 38/1, 40/1 дьиэлэрэ «Спортивнай». түөлбэни кэлимник сайыннарыы бырайыагын олоххо киллэрии бастакы түһүмэҕэр хапсыбыттара. 
2024 сыл алтынньы 24 күнүнээҕи туругунан тутааччы көтүрүллэр дьиэлээх 80 хаһаайыны кытта дуогабардаһан олорор. Ол курдук, 61 ыал (149 киһи) «Звезднай» түөлбэ «С» секторыгар кыбартыыра ыларга сөбүлэспититтэн бүгүҥҥү күҥҥэ 51 ыал номнуо саҥа дьиэҕэ күлүүстэрин туттулар.
Хаалбыт 19 ыалга (28 киһи) эргэ кыбартыыраларын оннугар харчынан төлөбүр оҥоһулунна (53 мөл. солк. тахса суумаҕа).
Маны сэргэ сэттэ кыбартыыранан суут дьарыктанар, сэттэ кыбартыыра харчынан төлөбүрүн күүтэр. Биир кыбартыыра хаһаайынын кытта сөбүлэһии баттанарга бэлэм.
«Спортивнай» түөлбэ бастакы дьиэтин сыбаайалара туруоруу быйыл алтынньы ыйтан саҕаланна - 2Б кыбаарталга 11 мэндиэмэннээх дьиэ тутуллуоҕа. 
Санатар буоллахха, «Спортивнай» түөлбэ 2-с, 4-с уонна 17-c кыбаарталлар оннуларыгар тутуллар. 10 сыл устата мантан 160 эргэ дьиэ олохтоохторун көһөрөн, спорт комплекстаах, 240 миэстэлээх оҕо саадтаах, 500-нуу миэстэлээх икки оскуолалаах, куорат нэһилиэнньэтигэр табыгастаах олоҕу хааччыйар атын даҕаны социальнай эбийиэктэрдээх саҥа түөлбэ тутуллуоҕа, диэн иһитиннэрэр РИА пресс-сулууспата.