100-тэн тахса туонна балык атыыга барда

Алтынньы 25-27 күннэригэр Дьокуускайга Хомсомуол болуоссатыгар ыытыллыбыт үгэс буолбут «Рыба Якутии» быыстапка-дьаарбаҥкаҕа 100-тэн тахса туонна сибиэһэй балык атыыга барда.
СӨ тыа хаһаайыстыбатын министиэристибэтигэр иһитиннэрэллэринэн, быйылгы дьаарбаҥка ордук кэрэхсэбиллээх түгэнинэн «Тоҥ балыктан ураһа» күрэх буолбут. 29 маастар 500 кг сибиэһэй балыктан 55 мүнүүтэ иһигэр 288,6 кг кыһыллыбыт балыгы бэлэмнээн, Ямало-Ненецкэй уокурук былырыыҥҥы 140 кг рекордун куоһарбыттар.

Маныаха бастыҥ көрдөрүүнү Абый улууһун "Сайдыы" хамаандата ситиспит – 82.75 кг кыһыллыбыт балык. Иккис миэстэни Усуйаана балыксыттара ылбыттар – 62,4 кг, үһүс миэстэ Булуҥ оройуонугар бэриллибит – 53,25 кг.

Эрдэ биллэрбиттэрин курдук, «Тоҥ балыктан ураһа» күрэххэ кыһыллыбыт балык атыытыттан киирбит үп анал байыаннай дьайыыга сылдьар байыастарга көмөҕө ыытыллар.
Санатар буоллахха, «Рыба Якутии» быыстапка-дьаарбаҥка сылга үстэ ыытыллар: кулун тутар ыйга Арктика күнүнэн, алтынньы ыйга – сааскы-сайыҥҥы булт түмүгүнэн, ахсынньы ыйга – Саҥа дьыл бырааһынньыктарынан, диэн иһитиннэрэр тыа хаһаайыстыбатын министиэристибэтин пресс-сулууспата.