“АЗИЯ ОҔОЛОРУН” МАССЫЫНАЛАРЫН бэлэхтээтилэр

“Триумф” спорт уораҕайын тэлгэһэтигэр СӨ физическэй култуураҕа уонна спорка министиэристибэтин тэрилтэлэригэр, «Олимпийскай эрэл» оҕо спорт оскуолаларыгар “Азия оҕолорун” оптуобустарын туттарыы үөрүүлээх түгэнэ буолла.

Мустубут дьону, эдэр спортсменнары СӨ Бырабыыталыстыбатын бэрэссэдээтэлэ Кирилл Бычков, СӨ физическэй култуураҕа уонна спорка миниистирэ Леонид Спиридонов эҕэрдэлээтилэр.

Бырабыыталыстыба бэрэссэдээтэлэ Кирилл Бычков бэйэтин эҕэрдэтигэр быйыл сайын Дьокуускайга буолан ааспыт Норуоттар икки ардыларынааҕы “Азия оҕолоро” VIII-с спортивнай оонньууларын курдук сүдү историческай суолталаах тэрээһиннэр салҕана туралларын бэлиэтээтэ. Ол биир арылхай көстүүтүнэн массыыналары туттарыы курдук үөрүүлээх түгэн үүммүтүнэн спортсмен оҕолорго, физкултуура уонна спорт үлэһиттэригэр истиҥ эҕэрдэтин тиэртэ, спорт саҥа геройдара тахсалларыгар баҕа санаатын биллэрдэ. Спорт миниистирэ Леонид Спиридонов  СӨ Аҕа баһылыгар уонна Бырабыыталыстабаҕа өйөбүллэрин уонна кыһамньыларын иһин махтанна.

Эҕэрдэлэр кэнниттэн бу сайын Дьокуускайга буолан ааспыт Норуоттар икки ардыларынааҕы “Азия оҕолоро” VIII-с спортивнай оонньуулар ойуулаах, суруктаах-бичиктээх “Паз” автобустар, “Газель”, “УАЗ”, “Патриот” массыыналар күлүүстэрин Бороҕон, Нь.С. Тимофеев аатынан Нам, А.И. Иванов аатынан Сунтаар Олимпийскай солбук оҕо спорт оскуолалара, А.И. Пахомов аатынан боксаҕа оҕо спорт оскуолата, футбол оскуолата, спорка солбугу бэлэмниир Өрөспүүбүлүкэ киинэ, Өрөспүүбүлүкэ сүүмэрдэммит хамаандатын бэлэмниир киин, Манчаары аатынан Өрөспүүбүлүкэ спорт национальнай көрүҥнэригэр киин, Адаптивнай физическэй култуура уонна спорт киинэ, физическэй култуура уонна маассабай спорт управлениета, спорт кыһыҥҥы көрүҥнэригэр оҕо спорт оскуолата, “Чолбон” харбааһыҥҥа аналлаах оҕо спорт оскуолата дьоһун бэлэхтэри ыллылар. Спортивнай оскуолалар ааттарыттан Нь.С. Тимофеев аатынан Намнааҕы Олимпийскай солбук оҕо спорт оскуолатын дириэктэрэ Василий Винокуров харда-махтал тыл эттэ.

Өрөспүүбүлүкэ спордун салайааччылара санааларын үллэһиннилэр.

Спорт миниистирэ Леонид Спиридонов: “Оонньууларбыт үрдүк тэрээһиннээхтик ааһаннар, өрөспүүбүлүкэбит Ил Дарханын, Бырабыыталыстыба дьаһалларынан спортивнай оскуолаларбытыгар, спорт тэрилтэлэригэр саҥа массыыналар бэрилиннилэр. Спортсмен оҕолорбут дьарыкка сылдьалларыгар, элбэхтик Сахаларын сиригэр күрэхтэһэллэригэр, улахан күрэхтэһиилэргэ бэлэмнээх буоллунар диэн уонна биһиэхэ “Азия оҕолорун” оонньуулара ыытыллыбатахтара ырааппытынан массыыналарбыт эргэрэннэр, бу саҥа тиэхиньикэ саамай сөпкө бэрилиннэ”. 

“Азия оҕолорун” Дирекциятын генеральнай дириэктэрэ Михаил Сивцев: “Бу оҥоһуллубут дьоһун бэлэх сүрүн сыала-соруга оҕолор элбэхтик кэлэн-баран күрэхтэһэллэригэр, оҕо спорда сайдарыгар, ситиһиилэринэн кынаттанан, дьоммутугар-сэргэбитигэр үгүс үөрүүнү аҕалалларыгар туһуланар. Оҕолорбут инники өттүгэр ситиһиилэрэ кэлэ турдуннар, спорт үрдүкү чыпчаалларын дабайалларыгар олук уурулунна. Улахан күрэхтэһиилэргэ кэлэр ыалддьыттарбытын, спортсменнары көрсөргө, илдьэ сылдьарга үчүгэй массыыналар эмиэ наадалар”.

Спорка солбугу бэлэмниир Өрөспүүбүлүкэ киинин генеральнай дириэктэрэ Александр Бугаев: “Бүгүн биһиэхэ үөрүүлээх күн. “Азия оҕолоро” оонньуулары тэрээһиннээхтик ыытаммыт, олус күндү бэлэх быһыытынан сабыс-саҥа “ПАЗ” автобус туттубут. Кииммит оҕолоро, тренердэрбит элбэхтик күрэхтэһэллэр, дьарыктаналлар, өрөспүүбүлүкэ үгүс күрэхтэһиилэрин тэрийэн ыытабыт. Онон бу наһаа улахан өйөбүл быһыытынан сыаналыыбыт. Өрөспүүбүлүкэбит үрдүкү салалтатыгар махталбытын биллэрэбит. Спортсмен оҕолорбут өрөспүүбүлүкэ улуустарынан, оройуоннарынан сылдьаннар, көрдөрүүлэрэ өссө үрдүөҕэ. Саҥа олимпийскай цикл саҕаланна. Аны икки сылынан кыһыҥҥы “Азия оҕолоругар” бэлэмнэнии күүскэ бара турар. Оҕолорбутугар эрэллээхпит”.

Саҥа массыыналар тэрилтэлэрин сылаас гаражтарыгар  айаннаатылар.

Ситиһиилэри баҕарабыт!